ORANJESTAD – En conexion cu e exposicion di ‘Lasonan Caribeño’, cu ta forma parti di e proyecto internacional di investigacion Nexus 1492, Minister Xiomara Ruiz-Maduro a reuni cu e team di Universidad di Leiden cu ta dirigi e proyecto aki.
E team ta consisti di Corinne Hofman kende ta lider di proyecto ta arkeologo y profesor na e Facultad di Arkeologia, Menno Hoogland , arkeologo na mesun facultad y Tibisay Sankasting Nava cu ta e coordinador general di e exposicion internacional di ‘Lasonan Caribeño’ hunto cu Suzette Boekhoudt, colaborador educacional di Museo Archeologico Nacional di Aruba.
ERC NEXUS 1492 ta un iniciativa di Universidad di Leiden cu cooperacion di diferente expertonan for di varios pais Caribense. NEXUS 1492 ta un proyecto di investigacion riba e lasonan di encuentro entre e prome habitantenan di Caribe y e colonistanan di e paisnan Europeo. En total e team investigativo a traha cu mas di 15 partner internacionalmente y Museo Arkeologico Nacional di Aruba ta un di nan. Aruba Museo Arkeologico a traha hunto cu Fundacion 1403, un fundacion cu ta promove y proteha patrimonio indigena. Ministerio di Cultura a duna tur colaboracion pa por a realisa e exposicion aki na Aruba.
Ta trata aki di un investigacion grandi cu estudionan haci riba tereno di arkeologia den un cantidad grandi di paisnan di Caribe. E exposicion di ‘Lasonan Caribeño’ ta basa riba un estudio di 6 aña bou auspicio di e proyecto di investigacion NEXUS 1492. Paisnan cu ta expone den e proyecto aki ta Cuba, Haiti, Republica Dominicana, St. Eustatius, Guadeloupe, Dominica, Barbados, Grenada, Surnam y Aruba. Meta di e exposicion ta pa duna informacion riba e conexion cu a existi den pasado entre e prome habitantenan di Caribe y cu te ainda ta existi entre e comunidadnan aki. E exposicion ta presenta e historia di e cultura indigena den Caribe y e lasonan cu esaki tin ainda den nos comunidadnan multi-etnico den Caribe.
Den e exposicion por haya sa mas di e impacto di e invasion di e colonistanan, di e explotacion cu a tuma luga y con e transformacion di e sociedad y cultura den Caribe a tuma luga. Tambe lo pasa un documentario di 45 minuut cu hopi informacion valioso.
E exposicion ta habri casi simultaneamente na 15 Pais den Caribe y na Hulanda y Aruba tin e primicia dia 22 di mei. Na Cuba e ta habri dia 24 di mei y na Hulanda dia 25 di mei 2019. Hunto cu e exposicion tin un catalog di informacion den forma di un revista cu a publica den 6 idioma, esta Spaño, Ingles, Frances, Hulandes, Creol y Papiamento.
Ruiz-Maduro ta gradici henter e team di ER-NEXUS 1492 y Universiteit di Leiden pa inclui nos pais Aruba den e investigacion. Tambe e mandatario ta yama danki na e personal di Museo Arkeologico di Aruba, specialmente Suzette Boekhoudt y Norman Maria, e team di Ministerio di Cultura y na Fundacion 1403 cu tabata dispuesto pa carga e proyecto aki hunto cu Museo Arkeologico di Aruba.
Ruiz- Maduro ta extende un invitacion na henter comunidad pa pasa bishita e exposicion na Museo Arkeologico di Aruba desde 22 di mei . E exposicion ‘Lasonan Caribeño’ lo keda Aruba pa un aña largo.
