Amnistia Internacional a cuestiona diamars pasa e rumbo di e gobierno di presidente Brasileño Jair Bolsonaro, kende segun e organisacion ‘ta cuminsa pa traduci un retorico toxico cu medidanan cu ta viola e derechonan humano’.
Na casi cinco luna di gestion di e ultraderechista, Amnistia a relata cu nan a adopta politica cu ta menasa ‘e derecho pa bida, pa salud, libertad, tera y teritorio di e poblacion Brasilero’.
E organisacion humanitario a cita, entre otro punto, e flexibilisacion di e regulacion pa e porte y uso di arma di candela dispuesto pa decreto, y e medidanan ‘negativo’ pa e derechonan di e pueblo indjan.
“Algun di e medidanan ta haci mas grave e risico di homicidio cu arma di candela, ta legitima un politica di siguridad basa na uzo di forsa letal, ta viola e derecho di e pueblo indjan y ta nenga e derecho pa e berdad di e victimanan di e regimen militar. Tur acompaña di un retorico hostil pa e derechonan humano”, Jurema Weneck, directora di Amnistia na Brasil, a adverti durante un conferencia de prensa na Brasilia.
Dia 31 di maart ultimo, algun cuartel encurasha pa Bolsonaro a conmemora, despues di varios aña, e aniversario di e golpi militar cu na 1964 a duna inicio na e ultimo dictadura.
Gobernador di 13 estado y districto federal Brasilero a informa diamars pasa di un carta abierto contra e decreto cu tin flexibilidad pa e reglanan pa haya un arma, nan a bisa cu e medida por tin como consecuencia e aumento di violencia na e pais.
