Proximamente trahadonan di dos compania lo participa den un referendum pa busca representacion sindical pa prome biaha. Ta trata di Boogaard Assurantien Aruba y Garage Cordia Aruba.
Mediador di gobierno, Anselmo Pontilius a declara na Bon Dia Aruba cu e proceso pa realisa e referendumnan aki a continua. Ya caba a wordo papia cu e partidonan, kier men e gerencia di e companianan y e sindicatonan di forma separa. Tambe a haya lista di e trahadonan y den tur dos casonan, e sindicatonan di acuerdo cu ley a cualifica pa e referendum aki.
“Tur dos sindicato a cumpli cu e rekisitonan legal, y awor e proceso lo tuma luga. Bo tin un referendum diamars y diaranson otro siman,” segun Pontilius.
Na Boogaard Assurantien Aruba, e total di trahadonan ta ariba 50 trahado cu tin derecho di voto. E sindicato cu a pidi e referendum ta SEPPA. E referendum aki lo tuma luga dia 28 di mei di 8’or di mainta pa 10’or di mainta na oficina di Boogaard Assurantien Aruba mes.
Di otro banda, sindicato FTA a pidi e referendum na Garage Cordia. Alrededor di 50 trahado tin derecho di voto den e referendum cu lo tuma luga dia 29 di mei awor. E orario lo ta di 11:30am pa 1:30 merdia na oficina di mediador di gobierno mes.
