ATA no a bandona mercado di Venezuela; Inversion den mercado Mericano ta dunando compensacion rapido

ORANJESTAD – Directora di ATA, Ronella Tjin Asjoe-Croes ta indica cu nos pais mester ta consciente cu e retonan cu nos tin nos dilanti den nos industria di turismo, no solamente ta depende di e situacion interno di Aruba, pero mundial.

Turismo ta un industria hopi sensitivo cu semper nos mester ta alerta, no solamente pa factornan interno sino externo.”Nos mester ta consciente di dje. E ta nos pan di cada dia. Turismo ta un negoshi fragil. Cualkier cos chikito por causa un impacto hopi grandi”, el a declara na Bon Dia Aruba.

Durante nos historia turistico,Aruba a yega di conoce momentonan unda impacto a afecta nos grandemente. Hopi di loke ta pasa den turismo ta dependiente di situacionnan di paisnan,unda Aruba ta promove su destino. Por ehempel si economia no ta bon y si tin situacion politico social cu no ta bon, nan lo afecta di tur manera locual nos kier captura turisticamente di e mercado ey.

El a laga sa cu ATA ta analisa situacionnan asina pa asina evalua unda ta miho pa pone inversion. Tin biaha ATA ta dicidi unda nan por baha inversion y pone mas den otro dependiendo di e fluho di bishitante. Esaki sin bandona totalmente un mercado.

Un decision asina a conduci cu actualmente e mercado di Merca ta representa un 73% di nos bishitantenan awendia. E ta haya cu e cifra aki ta uno di representacion halto. E ta un decision consciente di ATA pa bay den e mercado aki cu ta duna nos industria turistico un compensacion mas rapido riba e impacto cu e mercado di Venezuela por a nifica pa Aruba.

Venezuela
Un reto cu industria turistico local ta confronta actualmente ta Venezuela. Pa añanan e tabata e di dos mercado principal pa nos producto Aruba, despues di Merca.

Segun Tjin Asjoe-Croes, e mercado aki ta continua di ta un reto, pero ultimo añanan nos a logra surpasa esaki pa medio di decision clave. E mercado aki ainda tin cierto nivel di inversion di parti di ATA. Te hasta nan tin representacion di un oficina di turismo den un localidad mas chikito y menos personal. ATA a move si su oficina principal cu ta representa Latino America di Caracas pa Bogota.