Un di e popular autonan antiguo, conoci como “almendrones”, a causa diadomingo marduga un accidente serio riba Malecon di Habana, den cual tres persona a perde nan bida y 23 persona a keda herida.
Emisora oficial Radio Reloj na Cuba a duna e noticia di e accidente, den cual tambe tabatin tres mucha herida. Entre e personanan herida tin tambe dos stranhero cu fractura di hueso.
E accidente a sucede na e crusada di avenida 23 y Malecon, un sector hopi popular entre Cubanonan pa pasa nochi den fin di siman. Den e parti aki famianan completo ta keiro riba Malecon o ta sinta pa conversa.
Autoridadnan di salud a confirma cu a fayece tres persona como resultado di e accidente, ora banda di 12:30 un auto antiguo a perde control y a subi acera y a dal den e multitud na e lugar.
Accidente di trafico ta di cinco causa di morto na Cuba, unda na 2018 a registra 10.070 accidente cu a laga un saldo di 683 morto y 7.730 herido, cu un frecuencia di un accidente cada 52 minuut, segun dato di Comision Nacional di Seguridad di Trafico.
Durante inspeccion obligatorio realisa na 2018 a detecta “deficiencia tecnico” na 44 % di e autonan controla (63.966), principalmente na sistema di brake, stuur, y luz. Ademas a revoca mas di 36.000 permiso di vehiculo cu no tabatin nan revision tecnico na orden.
