Cristina Fernández de Kirchner lo ta candidata. Pero no pa e presidencia di e Republica di Argentina, sino pa e vice-presidencia. E lo sigui Alberto Fernandez, cu tabata hefe di gabinete durante e mandato di Néstor Kirchner y tambe, durante un aña, bou Cristina Fernandez mes.
E ex presidente a haci un inespera y inusual anuncio via Twitter. Pa prome biaha den historia, tabata e aspirante pa e vicepresidencia un persona kende a anuncia un candidatura presidencial. Alberto Fernandez lo papia pa prome biaha como aspirante awe dialuna na Santa Cruz, provincia patagonico di Kirchner.
Alberto Fernandez a utilisa radio y rednan social pa splica cu su hefe antiguo a convoca y a haci e proposicion di e formula Fernandez-Fernandez diaranson pasa, cual el a acepta di biaha. Tambe a traves di e rednan el a declara dispuesto pa traha y ‘regresa e dignidad pa miyones di Argentino y Argentina cu e gobierno aki a hundi den marginalidad y pobresa’.
Presidente Mauricio Macri, candidato mas probabel pa e reeleccion, a reacciona pa e anuncio sin menciona e sorprendente candidatura: “Bolbe na e pasado lo destrui nos mes”, el a bisa.
Ex-presidente Fernandez lo sinta pa prome biaha dilanti un tribunal e proximo diamars, den un causa cu ta investiga un red di presunto corupcion cu tin vinculo cu e contractnan di obra publico durante su gobierno. Na total, ta dies expediente cu ta hiba su nomber, cinco di nan ta cla pa e huicio oral, e huesnan a termina cu e etapa di instruccion y ta falta so cu un tribunal lo husga y dicta e sentencia. Hues Claudio Bonadio ta hiba ocho di e dies expediente. Den e transcurso di e investigacionnan, e magistrado a pidi cinco biaha e prizon preventivo pa Cristina Fernandez, pero e Senado a nenga di kita e fuero cu e tin como legislador, cual ta permiti pa e sigui den libertad.
