Mediante e programa di ayudo Venezolano Petrocaribe, Haiti a yega di ricibi casi 60.000 bari di crudo pa dia, den condicionnan hopi mas faborabel cu esunnan di e mercado. Mas di e mita di e costo di petroleo, cu a ser bendi cu un descuento fuerte, lo por debolbe 25 aña cu un interes di 1%, supuestamente loke tabata permiti gobierno utilisa e beneficionan aki pa fomenta e desaroyo economico. A cambio, Haiti tabata respalda Venezuela dilanti di Merca na foronan regional, manera Organisacion di Estadonan Mericano.
Pero a medida cu e gobierno di Nicolas Maduro tabata haci frente pa e caida di produccion di petroleo y su mesun problemanan economico, Caracas stop di manda miles di miyon di dollar cu petroleo pa paisnan di Centro America y Caribe, incluyendo Haiti, unda e fin di e crudo barata a produci cortenan di coriente importante.
Di otro banda, e Oficina di Monetizacion di Programa di Ayudo pa e Desaroyo di Haiti (BMPAD, siglanan na Ingles), a topa cu su mesun dificultadnan. Despues di cuminsa cumpra crudo na mercado internacional, e departamento a bisa e aña aki cu a keda sin fondonan operativo, y cu a laga di entrega di forma regular e combustibel necesario pa e stacion electrico cu ta mantene e luz cendi. Awor, mayoria di e poblacion di Haiti tin electricidad durante apenas tres ora pa dia.
E gobierno di Moise a pidi BMPAD, Ministerio di Finansa, y empresanan di energia priva pa propone via pa habri e mercado di petroleo ainda mas. Sinembargo, e director di BMPAD, Fils Aimé Ignace St. Fleur, a bisa cu su agencia no lo bandona e rol di supervision di importacion y tarifa di e petroleo na mayor. Pero e districto di Bourdon, Jean ta bisa cu e situacion ta bira cada biaha mas complica.
