Parlamentario Christiaans-Yarzagaray ta alerta nos gobernantenan: Merca su economia ta bay slow down

Parlamentario Setty Christiaans-Yarzagaray (MEP) a referi na e publicacionnan cu Banco Central di Aruba (BCA) a bin divulga recientemente. Di e publicacionnan aki, e ta haya importante e estadistica y tablanan cu ta bini hunto cu e parti cu ta midi economia di Aruba. E parlamentario, cu ta familiarisa cu cifranan y estadistica, ta alerta nos gobernantenan riba locual ta wordo premira, cu Merca su economia ta bay tin un disminucion of slow down.

“Esaki ta un noticia cu nos mester tene hopi bon na cuenta,” el a bisa. Como parlamentario e kier trece e punto aki na cuenta, ya cu nos por proyecta diferente resultado economico, pero economia Mericano ta uno cu Aruba ta depende grandemente riba dje. Analisando e conclusionnan di BCA su rapport, cu ta premira cu Merca su economia ta bay tin slow down, na Aruba nos mester tene esaki bon na cuenta riba su efectonan venidero.

Proyeccion economico
Igualmente, Christiaans-Yarzagaray a referi na e proyeccion economico di BCA. Den dje ta mustra con economia ta bay desaroya su mes pa cu 2018 (den comparacion cu 2017) y 2019. Loke BCA ta proyecta den crecemento economico pa 2018, unda e instituto aki a indica den un tabla cu e tabata 0.5% riba termino real y no nominal. Y awor e instituto aki a ahusta e cifra aki na 0.9%. E proyeccion aki ta casi mescos pa 2019 cu tambe a wordo ahusta evaluando diferente factor. Un di e factor principal ta turismo, unda e sector aki a logra sostene e parti economico.

Den e caso aki, aña 2019 a wordo proyecta riba 0.1%. Aworaki tin un proyeccion basa riba inversionnan cu e lo yega na 0.9% pa fin di aña aki. Christiaans-Yarzagaray, cu a yega di traha cu Oficina Central di Estadistica (CBS), ta considera e proyeccion aki como un bon noticia. El a referi na dje como un ‘noticia un poco alentador’. Logicamente tur hende lo desea pa e cifra aki ta mas halto, pero BCA den su conclusion ta señala cu Aruba su economia ta depende grandemente riba economia di otro pais, manera Merca.

Considerando cu gran parti di nos turismo a depende grandemente riba economia Venezolano; pero mirando e crisis interno den e pais bisiña aki, actualmente pais Aruba no ta conta den e proyeccion aki, ya cu Venezuela tin un economia instabil.