Un documentario nobo a bin dilanti cu mas caso di pastoor cu ta abusa di mucha, conmoviendo e pais, un di e sociedadnan mas catolico di Europa, provocando un disculpa di e herarkia eclesiastico, y forsando un sacerdote pa bandona su cargo.
E pelicula ‘No Bisa Ningun Hende’ a wordo estrena den fin di siman riba YouTube cu mas di 8 miyon di bista. Despues di wordo estrena, e premier di Polonia a duna palabra di gradicimento na a creador di e pelicula documentario, Tomasz y Marek Sekielski, pa nan balentia.
“Mi ta pidi dispensa pa herida aki di e hendenan di iglesia”, Obispo Wojciech Polak a bisa den nomber di iglesia y di e papa Francisco. E pelicula ta mustra evidencia nobo di pedofiel conoci. E ta pelicula ta habri cu Anna Misiewicz, 39, kende a bay confronta un pastoor cu abusa di dje ora e tabatin 7 aña.
Den e pelicula, ta mustra con Misiewicz ainda ta sufri di e abuso sexual. E pastoor ta admiti su fout y ta culpa diabel. “Mi sa cu mi no mester a haci e, ni mishi cu bo of sunchi bo. Un pasion estupido”, e pastoor ta bis’e.
E pelicula tambe ta mustra Dariusz Olejniczak, un pastoor cu ta sentencia pa abusa di muchanan di 7 aña, kende toch a ser permiti pa sigui traha cu mucha hoben. Riba diadomingo el a retira di su cargo como pastoor.
Politiconan tambe a reacciona pa e pelicula, primintiendo castigonan mas fuerte pa abuso di mucha. Lider di partido conservador, Jaroslaw Kacyznki, a priminti cu castigo di abuso sexual lo ta pa 30 aña.
Mayoria di Polaco ta identifica como Catolico y ta fuertemente pega cu e iglesia. Nan ta gradici iglesia catolico pa mantene e lenguahe y cultura di nan pais bibo durante mas di un siglo di ocupacion stranhero.
Pero manera hopi otro pais, Polonia mester a enfrenta revelacionnan recien di clergo cu a abusa di mucha. Na maart, autoridadnan di iglesia Polaco a bisa cu nan a registra caso di 382 clergo cu a abusa di 625 victima bou edad di 18 aña desde 1990.
