ORANJESTAD – Mientras cu refineria di Aruba tin mas di 5 aña cera, Gobierno ta haciendo tur esfuerso pa habri e refineria
“E tema di refineria ta keda un tema hopi delicado den nos comunidad, e chensnan cada biaha ta mustra mas scur. Mientras cu algun siman atras, mi a kere cu e problemanan tawata serio, actualmente, nan ta mas serio y cada dia ta bira mas serio. Loke cu profundamente mi ta lamenta”, ta palabranan expresa pa prome minister Evelyn Wever-Croes.
Mientras cu e seriedad di refineria ta escalando dia pa dia, oposicion ta purba di bira e situacion entre otro bisando cu gobierno di Aruba no tin interes pa habri e refineria cu fin pa haci wega politico. Prome nan a sali ta bisa cu gobierno tin mas interes den cannabis cu pa habri e refineria. Despues nan a bisa cu gobierno tin mas interes den hotel cu den habri e refineria. Pa e motibo aki mes, prome minister a expresa cu ta bon pa trece un biaha mas e realidad di e refineria manera cu e ta.
“Gabinete Wever-Croes a yega haya e refineria cera. Y desde e prome dia, nos gobierno ta haciendo tur nos esfuerso pa purba habri e refineria bek. E refineria di Aruba no a cera desde cu nos a drenta gobierno sino desde aña 2013 durante e gobernacion di gabinete Mike Eman. Ora cu nos a drenta gobierno, e refineria ya caba tawata tin 4 aña cera. Mike Eman no por bin bisa awo cu ami no a logra habri’e, mientras cu e mes tampoco a logra habri’e den e cuatro añanan durante su gobernacion”, prome minister a enfatisa.
E mandatario a expresa cu e refineria tin un importancia asina grandi pa nos pais por lo tanto no ta algo pa haci politica barata cu ne. Pa gobierno di Aruba e esfuersonan ta enfoca pa rescata e refineria teniendo cuenta cu tata y mamanan di famia kendenan ta traha eynan. Y esaki, gobierno a purba di tur manera y den tur angulo pa logra esaki. Awo a yega na e punto cu e prome ministernan di Aruba y Corsou mes ta bay Washington comienso di e siman aki pa atende cu e tema serio aki na unda tur esfuerso ta wordo haci pa nos yega na un apertura of un solucion pa nos refineria.
Prome minister a indica cu no necesariamente cu Citgo. E relacion cu Citgo ta un relacion hopi malo. Y si mira bek atras, e relacion aki nunca mester a bin riba pia mes. Citgo no ta un partner confiabel y no a tene su mes na niun palabracion ni cu e Gobierno anterior ni cu gabinete Wever-Croes.
“Loke nos ta purbando cu Citgo ta cera e capitulo ey y sali for di e contract. Nos no ta asina leu ainda. Abogadonan ta bezig cu e caminda ey pero mes momento nos kier traha y weita si tin espacio pa sigui desaroya un refineria den futuro talbes cu un otro operador. Si esaki no ta posibel, manera palabra den acuerdo di gobernacion, gobierno lo bay bek den comunidad pa conhuntamente dicidi si e pueblo ta desea un Aruba cu refineria of un Aruba sin refineria. Na e momentonan aki, gobierno ta haciendo tur esfuerso pa habri e refineria aki. Esaki ta locual nos a palabra”, prome minister Evelyn Wever-Croes a termina bisando.
