Ayera mainta, Aruba Tourism Authority (ATA) a realisa su habitual conferencia anual di CATA, cu su socionan y/of partnernan cu ta yuda promove y bende e producto turistico Aruba na Latino America. Un conferencia masha concuri cu socionan jong y familiarisa cu e factor di innovacion digital, cu a bira un gran prioridad pa ATA. Esaki ta wordo interpreta como un bon señal cu Aruba su turismo ta trahando cu un proyeccion pa futuro.

Aunke a trece cifra of pronostico riba e comportacion di nos turismo, loke a identifica e conferencia di CATA tabata cu rond di un topico actual y interesante, ATA a bin cu oradonan y talentonan jong. Daniel Castelblanco di Google Centro America y Caribe, y Camilo Plazas di MullenLowe SSP3, a duna nan presentacion riba data y influence marketing; y con por influencia e toma di decision riba potencial bishitante na momento cu nan kies nan destino turistico.

Influence marketing
Den e cuadro di e conferencia di CATA, director di ATA, Ronella Tjin Asjoe-Croes a trece dilanti cu e industria global di biahe y turismo a sigui prospera durante 2018, y e pronostico pa 2019 ta cu e lo sigui crece.

Pero el a laga sa cu, pa probecha e oportunidad aki, ta rekeri cu e principal autornan di e industria ta esunnan cu por modifica nan productonan y proceso lihe. Tambe esunnan cu ta wak innovacion como un componente integral di e modelo di negoshi turistico. Influence marketing a gana hopi popularidad durante e ultimo añanan.

Director di ATA a declara na Bon Dia Aruba cu nos mester ta orguyoso, ya cu for di inicio di ATA SG na 2011, e espiritu di ta diferente y innova a keda ta presente y a bira un prioridad. For di e aña ey, ATA a cuminsa un trayecto di transformacion di henter su plataforma di mercadeo y promocion. Aruba ta un di e prome den Caribe, of e prome di nos region, cu a opta pa cana un caminda no tradicional e tempo aya. ATA a opta pa destina 60% di nan fondo pa bay digital. Pues Aruba su industria turistico a pusta hopi tempran riba e parti digital, y mengua un poco riba television.

“Mi ta kere cu nos ta haci hopi esfuerso pa innova. E ta un di nos meta principal den ATA,” el a bisa. ATA ta haciendo uzo di socionan hoben di afo y local, cu ta forma parti di nan ekipo. Nan ta purba di mescla e generacion nobo aki cu esunnan cu tin mas experiencia. E ta hopi orguyoso di por a construi e ekipo aki, no solamente den ATA, pero den industria turistico local, caminda hobennan a cuminsa profila, y e ta haya cu mester sigui cultiva esey.

Tjin Asjoe-Croes a laga sa cu ATA ta den movemento semper, y nan ta supervisa continuamente e tendencia mundial cu ta afecta e industria aki. Ya cu nos proposito principal –segun Tjin Asjoe-Croes– ta esun di trece prosperidad pa nos pais mediante un turismo sostenibel. Pues sigura beneficionan economico substancial di e turismo pa medio di e aumento di e balor di economia di e bishitantenan. Pero esaki mester sosode na un ritmo mas lihe cu e volumen.

Igualmente, haci uzo di innovacion pa aumenta e atractivo di nos isla; pero tambe pa contraresta e competencia internacional. Entre otro, nan a yega di realisa estudio di turismo riba capacidad di carga, y tambe un estudio cu lo determina e ruta pa e desaroyo di turismo di niche, cu lo contribui na aumenta e balor economico. E desaroyo di niche lo yuda promove mercado di bishitante di entrada halto. Cuater niche clave lo ta boda, bienestar y cultura y actividadnan poniendo atencion riba nos naturalesa. Nan lo yuda pa Aruba su turismo por enfrenta presente y futuro di e industria aki.

El a determina cu e tres principal tema cu lo guia nos industria turistico pa aña 2025 ta balor di innovacion, sostenibilidad y liderazgo. Riba e parti di sostenibilidad, lo promove e crecemento controla cu por contribui na e desaroyo economico, social y ambiental di nos comunidad. Kiermen un turismo di halto balor y baho impacto. Un modelo cu ta basa su mes riba un crecemento di volumen di turista limita, y di balor halto. ATA lo sigui fortalece e liderazgo di nos autoridadnan di turismo di Aruba como un autoridad cu un vision pa futuro cu ta dirigi nos industria turistico.