ORANJESTAD – Minister Otmar Oduber a anuncia ayera durante su conferencia di prensa cu lo kier desaroya otro proyecto piloto na San Nicolas, desde su entrada te na e colonia. El a bisa cu hunto cu su coleganan, Minister di Transporte Chris Romero, minister di Asuntonan Economico Xiomara Maduro, y minister di Turismo Dangui Oduber, nan lo bay proteha e aspecto pa locual nan ta identifica e desaroyo di San Nicolas, cu ta e cultura y herencia cu tin pariba di isla.
Pa motibo aki, Oduber a expresa cu loke nan kier evita ta e mesun consecuencianan cu aworaki Palm Beach tin, cu shopping mall, restaurant y tur actividadnan cu ta den porta di hotelnan, cu tin consecuencia pa centro di ciudad. Den e caso aki di haci e ROPv, e ora ey mester cuminsa cuida y preserva e centro di San Nicolas, cu lo keda den actividad economico cu tin cu sostene e desaroyo di loke ta trata alohamento, cu por wordo crea den area di Sero Colorado.
Oduber a sigura cu esaki no ta posibel pa e aña aki, pero nan ta kere cu mirando e desaroyo pariba di isla, sea cu refineria, hotel, waf o ferry, e decision ta cu nan ta na e momento adecua cu ROPv pa uza como proyecto piloto pa e desaroyo di isla ta mara den e ley.
