ORAJESTAD – Diadomingo awor ta Dia Mundial di Enfermeria caminda un yamado a wordo haci pa mas hoben bira interesa den e profesion aki . Na Aruba ta wordo dedica no un dia sino henter e siman aki pa celebra e dia di tur profesional di enfermeria.
Ayera a tuma luga e apertura oficial na hospital y awe nan tin un regalito sorpresa pa e trahadonan y mañan nan tin nan tradicional desayuno caminda mil trahado lo comparti e mesun mesa y cuminda. Nan ta entre otro actividad recreativo y social cu nan tin programa pa duna balor na e dia special di enfermeria.
Jurette Croes kende ta un enfermera di profesion y promotor di salud di departamento di Salud Publico a laga sa cu e concepto di enfermeria a cambia. Antes e nursenan tabata wordo mira netamente pa cria y baña pashent. Pero nan labor ta uno amplio y hopi bunita. Nan ta motiva y curasha e pashentnan; te hasta conseh’e y scucha su dolor. E satisfaccion ta cu e persona ey ta keda recorda bo pasobra den e momentonan mas dificil abo como trahado di enfermeria tabata esun cu tabata cerca di dje.
E tema di e Siman di Enfermeria ta ‘Salud pa Tur.’ Salud pa tur, ya cu independiente di e rasa, sexo, nacionalidad, etc… e pashent semper mester keda respetabel y salud mester ta accesibel pa tur hende. Reechel Fingal ta un hoben enfermera di e seccion di HBO ta haya cu e siman aki ta uno importante pa nan ya cu e trahadonan di enfermeria ta bira central. El a bisa cu e ‘nurse ta e abogado pa e pashent.’ Ya cu nan mester traha cu tur e dokternan y specialistanan pa pashentnan cu no por papia pa nan mes. Igualmente el a entusiasma mas hoben pa bay den e carera aki cu ta duna e posibilidad pa nan crece.
Ademas e ta haya como un persona hoben dedica na enfermeria cu e ta un estudio hopi bunita. E ta gusta traha cu hende caminda nan mester yuda e pashent dia pa dia. “Bo ta wak progreso den e pashent. Bo ta mira un ser humano bay pa dilanti,” el a bisa. Sinembargo e ta un trabou compleho pam duna cuido y cu hobi balor humano. Ya cu enfermero por touch un pashent su curason dor di yude.
Ruthmila Odor-Croes kende ta zorg manager di hospital ta invita tur enfermero di Aruba cu no solamente ta traha den hospital, pero den diferente instancianan pa un y tur participa di e Siman di Enfermeria. Ya caba hospital a cuminsa celebra e siman aki y nan ta haya cu e aprecio di henter nos pueblo ta hopi importante pa nan por sigui realisa e trabou aki cu ta uno masha exigente y sacrifica.
