ORANJESTAD – Recientemente ‘Authentic Aruba’ a wordo honra durante e di 23 Annual Webby Awards 2019,esaki ta e honor di mas grandi pa ricibi den medionan social y internet.
Aruba Tourism Authority su iniciativa ‘The Authentic Aruba Campaign’ a wordo honra den e categoria di episodionan visual cu contenido cual ta integra producto, servicio of strategianan di mercadeo na mes momento educando y entretene un audiencia.
Ora bo wordo honra por medio di e Webby Awards, e ta nifica cu bo ta den e top 20% di e 13,000 registracion (ricibi e aña aki) for di 50 estado Mericano y 70 diferente pais rond mundo. Webby Awards ta wordo reconoci manera e honor di mas grandi riba internet por medio di New York Times, y ta actualmente e organisacion internacional cu ta liderando den locual ta honrando contenido di excelencia riba internet incluyendo websites, video, mercadeo, Media & PR, Apps y hopi mas. E compania Disney por ehempel a wordo nombra e aña aki como tambe diferente talentonan y ‘influencers’ independiente. Aruba Tourism Authority ta sumamente orguyoso cu e honor aki y un pabien ta bay na tur miembro di A.T.A. y agencianan partner pa nan contribucion, vision y sosten.
