ORANJESTAD – E dia di ayera a celebra na Fort Zoutman un Feria Gastronomico y Cultural Latino, cu a ser organisa pa e grupo Chat Unidos por Venezuela, cu colaboracion di Fundacion Mary Joan Foundation y varios grupo di pais como Peru, Portugal, Republica Domicana, Aruba y Venezuela. Nan a reuni cu e obhetivo di recauda fondo pa varios organisacion y fundacion na Venezuela encarga di yuda e personanan mas vulnerabel.
Sra. Luisa Peterson, representante di e grupo ‘Chat Unidos por Venezuela’ a declara pa Bon Dia Aruba cu nan hunto cu otro grupo tabata manda donacion pa Venezuela, pero pa via di e ceramento di frontera, nan no por haci esey mas.
Peterson a expresa cu na e momentonan aki nan ta preocupa, pa motibo cu na Maracaibo, Venezuela tin luganan cu ta depende di e ayudo cu nan ta manda pa nan desde Aruba, por ehempel e Leprocomio di Maracaibo, un luga di hende grandi cu mester di alimentacion, medicina, paña y ayudo, pa motibo cu nan no tin suficiente fondo pa su mantencion.
Tambe Peterson a gradici Mary Joan Foundation pa su apoyo, pa motibo cu nan a duna su man pa e evento aki. Tambe el a expresa cu pa via di e fundacion tambe nan por yuda e pashent di cancer cu ta na Venezuela.
Di mesun manera, Peterson a manifesta cu nan no ta un fundacion estableci na Aruba, pero nan ta traha cu fundacionnan na Venezuela y ta duna e claridad y transparencia di loke nan ta haya pa e fundacionnan na Venezuela.
Peterson a duna di conoce cu e evento aki ta e prome cu nan ta haci, y a bisa cu basta hende a acerca Fort Zoutman pa ofrece su ayudo cumprando cuminda, e artesania cu artesano Venezolano tabata ofrece, y wak e varios baile folklorico cu tabata presente eynan. E fondonan recauda lo bay destina pa diferente fundacionnan na Venezuela cu nan ta yuda.
