Den un conferencia di prensa, minister Otmar Oduber (POR) a informa tocante e black out di Aruba, hunto cu Marlon Croes, director di DOW, cu e situacion di sistema di riool na e area di Palm Beach.
Director di DOW, Marlon Croes a bisa cu na area di Palm Beach a sucede dos black out. E sistema di riool a sufri daño pa 7or di anochi. “Nos tin dos pomp pa nos sistema di riolering, e ta delicado ora cu coriente bay. Pariba di riu, nos planta cu ta purifica awa na Bubali, den e proceso, e sistema tin e huffer cu por wanta 2 pa 3 ora prome cu e bay riba caminda.”
Segun Croes, e team mesora a mobilisa pa trata cu esaki. Den e proceso cu a yega na e luga, a haya esaki limpi. A encontra cu e planta y a ripara cu tin coriente bek. Elmar a pone e planta bek den funcion.
Awo esun di saliña cerca di Bubali, na e siguiente black out, e awa a cuminsa sali banda di The Mill hotel. Pa 11or di anochi a bay trata cu e situacion, caminda un truck mester a haci 5 biahe pa asina mainta tin e caminda limpi.
Nan a move e pomp, y bay den contacto cu Elmar pa por suministra coriente, pa asina por drecha e sistema. Pa 4or di mainta a keda cla cu e trabou y drecha e ‘consecuencia di e black out’.
E mandatario a bisa cu durante henter e trayectorio a keda den contacto cu director di WEB y henter e team, pa asina ta den comunicacion mirando cu minister president ta na Sint Maarten cu reunion cu otro prome ministro den reino.
Pa locual ta trata siguridad, e mandatario a bisa cu esey tabata un punto di atencion, anto a pone un helicopter na cierto momento pa presencia mas amplio y tin supervision pa cualkier suceso.
El a remarca cu semper lo tin fayo cu por tuma luga na caminda ora ta trata di mashin. Nan lo haya e rapport necesario for di WEB y Utilities pa evita cosnan asina den futuro pa oranan largo.
Agradecido, el a bisa cu WEB a soluciona e problema, y cu den ora nan di madruga por a cuminsa suministra coriente na algun bario di Aruba, te cu awo tin un situacion stabiel na e planta, y cu nan sa e fayo di awo, cu asina por acudi den futuro.
