ORANJESTAD – Recientemente minister di Enseñansa Rudy Lampe, cu no lo elimina Tra’i Merdia, pero lo duna e trahadonan di Tra’i Merdia e oportunidad di crece pa drenta e sistema regular di enseñansa.
E mandatario a duna di conoce cu e proyecto di Tra’i Merdia a cuminsa for di tempo di gabinetenan Henny Eman 22 aña pasa. Tin un necesidad den nos sociedad, e pueblo tin mester di un Tra’i Merdia y nos ta cumpli cu e deseo cu tin den comunidad.
Sinembargo loke cu gobierno actual ta haciendo, ta haci cierto cambionan na Tra’i Merdia debi cu e proyecto aki a cuminsa 22 aña atras. E tempo ey mundo y Aruba tambe no tabata conoce e revolucion digital. Esaki kiermen cu e tempo ey nan tabata sigui cu e sistema di huiswerk. P’esey mes huiswerkbegeleiding tabata hopi importante den e proyecto di Tra’i Merdia.
Minister Armand Rudy Lampe kier ta bon cla cu no lo bay elimina Tra’i Merdia, pero si ta haci cierto cambionan. Tambe lo keda atende e preocupacionnan cu tin di e mesun trahadonan di Tra’i Merdia. No ta un secreto cu e trahadonan a expresa na gobierno cu nan deseo ta pa traha 40 ora pa siman debi cu na e momentonan aki nan ta wordo paga pa 31 ora pa siman. Loke cu mester ta bon cla tambe cu no ta for di awo nan ta traha e 31 oranan aki, pero na momento cu e gobierno anterior di gabinete Eman tabata t’ey tambe. Sinembargo e gobierno anterior no a responde na e preocupacion aki. Sinembargo awor e gobierno actual a bin cu un proposicion unda ta ofrece na esunnan cu tin suficiente preparacion pa por haci un formacion posterior pa bira onderwijsassistent y hasta por yega na bira maestro di scol den futuro.
“Gobierno di Aruba a ofrece e trahadonan di Tra’i Merdia e posibilidad pa drenta e sistema regular di enseñansa y a base di e progreso aki por sigui studia y asina aki tambe nan por mehora nan futuro y esunnan cu ta logra drenta den e sistema aki pa sigura un bon educacion di enseñansa na Aruba. Gobierno ta ofrece nan e 40 ora cu nan lo haya merecidamente”, minister Lampe a indica.
E mandatario a bisa cu e muchanan y hobennan ta mas conecta cu nos rond mundo. E mucha di awo no ta e mucha di 20 aña pasa. Esey ta un indicacion cu no por sigui mes un cos cu e sistema di 20 aña pasa . Esaki ta pone cu enseñansa general tin cu cambia y bay cu tempo, esaki ta pone cu e Tra’i Merdia tambe mester cana cu tempo. Na e momentonan aki rond mundo nan ta cuestiona si huiswerk tin sentido pa muchanan chikito. Ya caba a cuminsa un desaroyo rond mundo cu na scol, nan ta cuminsa cu nan huiswerk pa asina despues di scol e muchanan por desaroya su mes cu otro actividadnan. Esaki ta loke cu gobierno actual kier stimula.
