E sancionnan petrolero diMerca contra Pdvsa a drenta na vigor diadomingo pasa, na un momento den cual e crisis na e pais ta birando mas severo, unda cu e regimen di Nicolas Maduro ta en pugna cu e lider di oposicion Juan Guaido.
E restriccionnan di compra di crudo di e empresa petrolera estatal Pdvsa cu a drenta na vigor ta forma parti di un bateria di sancion cu Merca a impone, cu ta toca e propio Maduro, pero tambe institucion politico y financiero den cuadro di su campaña di apoyo na Guaido.Diabierna pasa gobierno di Trump a actua cu su tenaz strategia sancionando Jorge Arreaza.
“Dia 28 ta marca entrada na vigencia die sancionnan, sin embargo, desde cu a anuncia nan, e realidad ta cu comercio di petroleo entre Merca y Venezuela tabata absolutamente limita el a cay abruptamente,” Mariano de Alba, experto den derecho internacional cu sede na Washington.
Prome cu e sancionnan anuncia na januari, Venezuela tabata exporta 500.000 bari di petroleo ultra pisa pa Merca, unda Citgo ta opera, filial di Pdvsa, di cual e cuentanan a keda blokea despues di pone mando di Citgo den man di Juan Guaido.
Pa de Alba, si ainda tin algun operacion entre Pdvsa y cualkier empresa Mericano o compania cu ta haci uso di e sistema financiero di Merca, sin duda desde 28 di april e sancionnan ta vigente y cualkier compania lo ta asumiendo riesgonan mas grandi cu prome cu e fecha ey.”
Un consecuencia clave di e sancionnan ta cu e regimen mester a busca otro proveedor di diluyente pa por maneha e petroleo ultrapisa, loke ta aumenta costo di produccion.
E firma consultor Rapidan Energy Group, basa na Estadonan Uni, a calcula den un informe cu produccion di Pdvsa por perde temporalmente como 200.000 bari pa dia. Produccion di crudo, cu tabata na 3,2 miyon bari pa dia na 2008, a baha te na 840.000 bari pa dia na maart pasa.
