E caida di un bus for di un baranca na Bolivia a laga 25 morto, den e accidente mas grave na e pais Andino di e aña aki, a informa dialuna pasa e hefe di polis caminera.
“Nos ta recuperando e curpanan, nos ta papiando te e momentonan aki di 25 fayecido cu ta confirma, y 24 herido, cu a ser traslada pa distinto hospital”, e hefe di e polis caminera, Fernando Rojas, a informa.
Oranan mas trempan, e hefe nacional di polis, Yuri Calderon, a informa den un conferencia di prensa cu e number di morto pa e accidente, cu a sosode diadomingo pasa, tabata di 17 y no tabatin persona herido.
E bus di pasahero a cay for di un baranca na e sector denomina como Yolisita, 90 kilometer nort di e ciudad di La Paz, na un caminda cu ta sirbi como porta pa drenta pa Amazonia.
E presidente Evo Morales, cu ta di bishita na Argentina, a lamenta e hecho riba su cuenta personal di Twitter: “Nos ta hopi tristo pa e accidente grave cu a sosode na e caretera La Paz-Yungas. Nos condolencia pa e famianan di e fayecidonan”. Tambe a recomenda pa hende tin mas precaucion.
Ta trata di e accidente mas grave cu ta registra na Bolivia e aña aki. Na februari tambe tabatin un cu a laga 24 morto y 12 herido, y na januari otro accidente cu un cifra di 22 persona fayecido y 30 herido.
