ORANJESTAD – Durante e temporada di campamento cu habitualmente ta tuma luga den e dianan aki cant’i di lama, departamento di higiena y inspeccion di alimento tambe tin recomendacion y sugerencia.
Sra. Yvette Geerman, cu ta encarga cu e seccion aki di departamento di salubridad publico (DVG), a pone atencion na e hecho cu nos ta disfruta di e tipo di campamento aki, caminda e hendenan ta sali for di nan cas pa busca un sitio pa campa, y unda nan no tin e mesun condicion, manera cada un di nos tin den nos cas.
Algun di nan tin di haber cu accesibilidad di coriente y awa regularmente. P’esey nan ta conseha di forma constructivo tur esunnan cu ta bay campa pa haci un bon planeamento. Un punto importante tin di haber pa cuanto dia nan ta bay campa, pa asina corda hiba suficiente awa. “Awa limpi, ya cu esaki ta e parti basico pa un bon situacion di higiena.
Ta importante pa nan laba semper nan man bon. Si bo tin muchanan den e campamento, ta importante pa educa e mucha pa nan tambe laba nan man. Pa loke ta e bon condicion di e cuminda, si bo tin pensa di hiba cuminda friu, no lubida di hiba hopi ijs pa bo wanta bon conserva bo cuminda.
Tampoco lubida di hiba cuminda cu tin menos risico of cu por daña facil. Un sugerencia tin di haber cu e consumo di cuminda den bleki cu bo mes por prepara. Si bo tin famia cu no ta bay campa, bo por coordina cu nan pa trece e cuminda aki unda bo ta campa.
Igualmente, Geerman ta bisa si bo ta haci barbecue, corda bon cu e ta curu y cu bo mester prepara bo cuminda bon y cushin’e bon pa suficiente tempo. Si den caso cu bo ta bira malo, ta consehabel pa bo bay dokter di biaha. Departamento di higiena y inspeccion di alimento kier pa tur esunnan cu a bay campa por pasa un temporada agradabel y safe.
