WILLEMSTAD – J.L. cu tin sentencia di TBS despues di un aña den Foba, e departamento psikiatrico di prizon di Corsou, ke sali liber. Ultimo biaha cu J.L., cu ta sufri di psicosis, a sali for di prizon, esaki a trece hopi intrankilidad u un delito nobo.

Pasobra despues di Foba hende ta cay den un buraco scur scur: e hospital general psikiatrico no ta tuma pashent ‘peligroso’ y Reclassering no tin control sin medida pa forsa. Ke men liber ke men berdaderamente liber. Ta posibel cu gobierno di Corsou lo hay’e confronta cu e mester duna cuenta pakico no tin un trato TBS adecua y completo.

No ta excepcion mas
Su psikiatra Frans Heijtel ultimo biaha a purba pa tene J.L. ‘mas o menos bou di control’ ambulantemente. “E tabata drumi cerca di nos oficina medico y tabata tuma algun remedi.” J.L. no ta un excepcion mas. “Entretanto mi tin varios pashent psikiatrico cronico cu no ta bonbini mas na Caprileskliniek”, Heijtel ta avisa.

Casi 10 aña despues cu a inclui e regla di TBS (medida hudicial cu ta pone un criminal na disposicion di gobierno pa tratamento) den Codigo Penal di Corsou, ainda no a completa un trayecto completo di TBS. Unico posibilidad ta tratamento forsa temporario den prizon di Corsou. Esaki ta segun e fuente Retkaribense.

Resocialisacion
Con ta para cu resocialisacion despues di castigo di prizon? “Si ta trata di cliente TBS, Reclassering su mannan ta mara”, Anchel Gibbes, trahado social senior na Reclassering ta bisa. “Un gran parti di e ex detenidonan cu problematica psikico ta cana pornada.”

Na Corsou no ta posibel pa duna TBS ambulante, Ginnes ta bisa. “Nos tin diferente cliente cu bo sa cu bon mira ta cliente TBS nan ta. Practica y experencia ta mustra cu bo por haci masha poco pa e clientenan aki. Tin biaha ta asina complica y bo no por bay niun caminda.”

Gobierno ta responsabel?
Si J.L. sali liber sin trato TBS adecua y (atrobe) causa un hende daño, por tene gobierno di Corsou responsabel? E pregunta aki ta ocupa Sjoerd Bakker tambe, cu ta alia na Vrije Universiteit di Amsterdam. El a skirbi un articulo cientifico tocante di esaki, cu segun ta spera na juni lo sali den e revista Caribense di hurista.

‘Gobierno tin e obligacion di percura pa un regimen di tratamento adecua’
-abogado Sjoerd Bakker

“Falta di un regimen di TBS adecua na Corsou ta trece riesgo di siguridad pa ciudadano y comunidad cu gobierno di Corsou conoce y ta premira”, Bakker ta conclui. E riesgonan aki ta asina grandi cu por bisa cu gobierno di Corsou tin un deber di cuido y cu e ta obliga segun derecho civil pa kita e riesgonan aki efectivamente, pa ainda percura pa un regimen di tratamento di delincuente psikicamente afecta.”

‘Mester di cooperacion den Reino’
Si no ta posibel pa trata cierto delincuente psikicamente afecta na Corsou mes, mester busca cooperacion cerca otro pais den Reino, segun Bakker. “Keda sinta keto di tur manera no ta un opcion. Pa no cumpli cu e deber di cuido ey pa gobierno ta crea un riesgo di responsabilidad pa daño cu kisas e mes no ta consciente di dje.”

Ta falta un clinica di TBS
“E isla ta falta un clinica di TBS caminda nos clientenan por haya ayudo adecua”, Claudia Knoppel ta bisa. Ministerio di Husticia a mand’e temporalmente pa yuda na Reclassering pasobra nan ta lucha cu un falta cronico di personal. “Unico cos cu bo por haci ta duna un noticia di resultado malo, informa OM pa aresta nan atrobe, pa nan cay cera den prizon atrobe.”

Knoppel y Gibbes ta papia di un situacion cu ta haci dolor. “Bon mira un situacion peligroso pa comunidad si bo pensa bon”, Knoppel ta bisa.