ORANJESTAD – Ayera durante un conferencia di prensa ministro di Turismo, Salud y Deporte Dangui Oduber (MEP) a duna di conoce cu a cambia e tipo di target, cu inicialmente tabata enfoca riba e turista cu tabata gana pa aña 100.000 dollar of mas, despues cu gobierno a cambia.

Ministro Oduber a expresa cu nan ta enfoca mas ainda riba turismo di calidad y a cambia e approach di turista pa entrada di 150.000 dollar pa aña.

Ministro Oduber a comenta cu siman pasa Banco Central a emiti su rapport di Tourism Receipts di aña 2018, pa loke ta trata esey el a splica cu Banco Central a traha e rapport aki pa duna un indicacion di cuanto placa e turista ta laga tras den economia di Aruba. Durante aña 2018 a raporta un aumento di 8.2%, cu un crecemento di e cantidad di placa cu 270 miyon florin y en total e turistanan a laga atras 3,6 biyon florin den nos economia.

Asina tambe ministro Oduber a manifesta cu e cifranan di sector hotelero ta indica e mesun tendencia. E RevPAR cu ta e entrada pa camber disponibel, di januari te maart di aña aki tin un averahe cu e turista ta pagando di 302 dollar pa camber pa nochi, loke ta indica un crecemento di 6,6% compara cu aña pasa, cu tabata na 283 dollar.

E grado di ocupacion na e momentonan aki ta di 90%; 9 di cada 10 camber durante e prome tres luna di aña tabata ocupa, loke ta indica cu “turismo ta keda e sector principal di economia y ta keda e pilar economico mas importante,” el a sigura.

Di otro banda, e mandatario a duna di conoce tambe cu e evento Island Fest lo tuma luga dia 29 di mei na San Nicolas; esaki lo ta un serie di evento cu un bes pa luna nan lo haci manera un concepto diferente pero cu segun el a expresa lo bay duna e resultado cu nan ta busca.

Tambe el a anuncia cu e oficina di Turismo na San Nicolas otro siman lo conoce su reapertura. E oficina den ultimo luna a wordo renoba y transforma completamente, haciendo uso di hopi tecnologia y innovacion, y lo mester fungi como un centro di informacion na San Nicolas pa esnan cu ta yega ey y ta busca informacion di San Nicolas y kico tin di ofrece. Segun e ministro a expresa, varios luna atras gobierno a laga sa cu tin un plan integral pa e area ey di e isla.

E proyecto di Baby Beach cu lo bira un proyecto di embeyecemento cu trabounan pa drecha e area di parking, cancha deportivo y un restaurant nobo, segun cu minister di Turismo a anuncia e proyecto aki tambe lo cuminsa na luna di juni.

Ademas minister Oduber a informa di e proceso di negociacion di e proyecto di un boutique hotel cu 50 pa 75 camberm tambe na area di San Nicolas. El a sigura cu na e momentonan aki gobierno tin un proceso di negociacion basta leu pa construi e hotel ‘all inclusive’ aki.