Presidente di Camara di Comercio y Industria di Aruba (KvK), Daphne Agius Cesareo-Lejuez a bin cu un aclaracion riba nan punto di bista riba e topico controversial di “all inclusive”.
El a bisa cu KvK a aclaria cu a Sali den prensa cu nan a manda un carta pa minister di Turismo den cual e organismo aki ta sostene e iniciativa pa un consenso. ‘Mi kier ta hopi cla cu na niun momento nos a tuma parti ni pa un ni pa e otro partido, pero cu nos ta sostene e iniciativa pa yega na consenso”, sra. Cesareo-Lejuez a bisa.
E ta haya cu den e consenso aki por tin espacio pa un “countdown” pa asina e partidonan por yega na un consenso. E espacio aki lo permiti pa nan por haya mas informacion y asina nan por hiba e discusion na un manera balansa. “Esaki ta loke Camara di Comercio ta desea di wak”, el a bisa.
El a declara cu no ta cuestion cu KvK a tuma parti pa minister of cu nan a tuma parti pa Ahata. Tampoco cu nan kier forma parti di e combersacion aki.
Den e caso aki KvK su posicion ta di tuma parti di interes general cu ta esun di sinta na mesa y yega na un consenso.
Si kvK ta duna sosten na e iniciativa cu ta den e carta cu ta esun di sinta na mesa pa yega na un consenso dor di un discusion sano y balansa.
Directora di KvK a bisa cu absolutamente nan no a wordo forsa pa añadi cantidad di firma den e carta di Ahata. E ta bisa cu nan a wordo pidi pa wak si KvK ta sostene e iniciativa pa yega na un consenso y esey ta “loke nos a firma netamente”, segun sra. Cesareo-Lejuez. El a laga sa cu minister a lamenta cu nan a firma e carta, pero nan a aclaria e posicion di KvK. “Nos no a firma e carta pa sostene Ahata”, segun directora di KvK. E ta agrega cu nan a firme pa yega na un consenso.
