Na e hospital Alexander Monro (Bilthoven) cu ta specialisa riba cancer di pecho, a ser haci un encuesta cerca 400 muhe pa wak nan conocemento riba e materia di cancer di pecho. E conclusion cu nan por a saca ta cu conocemento ta haci falta cerca mayoria di nan.
Segun e fuente nos.nl ta raporta, na Hulanda alrededor di 1 di cada 7 hende muhe ta haya cancer di pecho. E cifra ey ta igual na 17 mil diagnostico positivo na cancer pa aña y no obstante cu e cifra di sobreviviente a subi drasticamente, toch un 3 mil hende muhe ta muri di esaki pa aña.
E estudio haci a revala cu 7 di cada 10 hende muhe cu nan a papia cu ne no tabata sa con wak e señalnan y/of simptoma di cancer di pecho y cu nan no sa cu mira den e pecho ta miho cu fula, segun e director di e hospital. “Nos ta ricibi pa hopi aña cacaba grupo di persona cu no ta na altura cu ta miho pa mira den e pecho cu djis fula”, e directora Marjolein de Jong a declara na NOS Radio 1 Journaal. Tambe a resulta cu 1 di cada 5 hende muhe nunca a of ta controla nan pechonan, ya sea door di mira of fula.
Pa por concientisa mas hende muhe posibel, e hospital a cuminsa cu un campaña cu ta ser inspira pa esun na Ingles titula ‘Know your lemons’.
E directora ta pone enfasis cu ta di sumo importancia pa e hende muhe controla su pechonan ya cu mas trempan tin un diagnostico, mas lihe por actua y evita e pio.
