Ex no kier accepta cu cos a caba, dos persona herida pa via di e problema aki

Diabierna anochi den careda di 9:45 polis ta bay un adres ya conoci pa nan na Savaneta. Aki nan lo tabata trata di un problema cu tabata saliendo completamente for di man.

Na yegada nan ta compronde cu ta un caso andando pa basta tempo caba, caminda e homber esta e ex no kier accepta cu cos a caba cu e dama na dicho adres. E relacion a caba casi 1 aña atras y constantemente polis mester bay e adres paso e homber ta keda haci fastioso.

Diabierna anochi e homber ta drenta e cas y agredi e dama door di choke, y tambe kibra cos den e cas . E dama su tata, un persona di edad a bay defende su yiu. E ex e momento ey a dal e anciano tambe, e tata na su turno pa defende su mes a pasa man pa un pida palo y a dal e ex heridando e basta bon ariba su cabes, y esaki tabata sangra.

Polisnan cu a yega na e sitio mes ora a detene e homber cu a bin busca problema. Ela wordo hiba Centro Medico pa despues e bay warda di polis.

Manera nos a bisa caba, e caso aki ta andando pa hopi tempo caba y no ta mustra di tin un final. Nos ta spera cu autoridad por actua y stop e problema aki por cu algo hopi serio pasa.