Den e ultimo simannan nos por a lesa y tende mas critica riba maneho di e actual gabinete, tal vez como antesala pa e manifestacion di oposicion di awe. Realmente e cantidad y contenido di e critica tabata mas suave cu por a anticipa.
Tin varios punto riba cual nos a spera mas critica pero esaki no a concretisa. Manera e manera con den ultimo simannan nos prome minister a maneha e asunto di e refineria, unda tabatin varios aspecto unda nos a spera mas di oposicion. No pasobra necesariamente nan lo tabatin razon, pero a spera cu nan lo a bin ‘defende’ un di e piesanan clave di nan maneho durante nan gobierno. Specialmente despues di e ultimo acontecimentonan alrededor di e negociacionnan cu Citgo y cu autoridadnan Mericano riba flexibilisacion di e prohibicion di haci negoshi o pasa placa pa Pdvsa, nos a spera un avalancha di critica pa e manera con a yega na un final bastante abrupto na e perspectivanan pa reapertura di e refineria, disculpa, e ‘upgrader’.
Esey ta implica cu e partido opositor sin mas ta acepta cu a yega un fin na e proyecto unda nan a hinca tanto esfuerso aden? Y, manera cos ta pinta awor, sin ningun resultado positivo? Bon, resultado positivo si bo ta di opinion cu mester a haci tur lo posible pa e refineria bolbe den operacion. Pa esnan cu nunca a kere den e reactivacion aki, e ultimo noticianan tabata positivo, no den sentido di e perdida di empleo pa esnan envolvi, pero si pasobra finalmente nos por cuminsa orienta nos mes riba futuro, y stop di mira atras den lamento pa loke tabatin y lo no t’ey mas den futuro. Por ta cu nos por conclui di nan silencio cu nan tambe ta bay pone e tema aki sosega? Nos no ta kere esey si, pasobra e partido opositor semper a mustra di ta mas strategico y lo mester a pensa caba kico mester bay haci despues cu e refineria no t’ey mas. Lo ta bon si nan ta concentrando caba riba kico lo mester sucede den futuro pa nos por tin un desaroyo economico sano. No tur plan mester bin di e actual gobierno.
En todo caso nos por a tuma nota di e critica riba e iniciativa reciente di gobierno pa mantene e prijs di gasolin, y otro combustible, na mesun nivel, y no aumenta esaki segun e sistema cu a maneha pa hopi aña. Nos mester bisa cu nos tambe a keda un tiki asombra cu e decision aki. Naturalmente e ta zona bunita pa e consumidor cu ta pensa cu nan a haya un alivio, pero nos mester pensa mas leu. Por ta berdad cu tin un reserva di combustible cu a cumpra na un prijs faborable, mientras cu si introduci e prijs di biaha, e consumidor lo por pensa cu e ta pagando di mas pa un producto cu no a costa tanto. E otro banda di e medaya ta cu ora prijs baha, y tin un stock cu a cumpra na un prijs mas halto, lo ta logico pa durante un cierto tempo ta keda bende na e prijs halto anto? Tur hende cu dos placa di sinti por sa cu den e tipo di mercado aki cu ta subi y baha semper tin momento cu tin un ‘mismatch’ entre prijs actual y e prijs pa cual lo mester bay cumpra e siguiente lote, pa loke e prijs ta na tal momento riba mercado. Es decir, segun e sistema usa durante varios aña, tin momento cu bo ta gana un tiki y tin momento cu bo ta perde un tiki. Pero loke nos no ta apoya, di ningun gobierno, cu ta cuminsa hunga cu e asuntonan aki pa motibo politico. Por ta cu no a bin cu e idea aki pasobra awe tin un manifestacion di oposicion, manera oposicion ta sugeri. Hasta si no ta asina, no ta parce nos un bon idea pa mishi cu e cosnan aki, sin cu realmente nos a mira un argumentacion convincente.
Ta masha bunita pa conta pueblo cu bo no ta bay mishi den nan cartera pa cobra nan mas pa combustible cu a subi di prijs, pero e compania responsable pa importacion y distribucion mester absorbe e ‘daño financiero’ aki? Y kico ta haci despues, ora prijs internacional baha, e ora tambe ta keda cobra e prijs halto pa compensa pa e reservanan usa pa ‘please’ hende? Na Hulandes sa bisa: “het moet uit de lengte of uit de breedte komen.” Pakico no ta conta hende henter e storia, cu tin varios banda cu bo mester conoce pa bo por tin opinion funda riba e asunto aki? Nos no ta mira ningun motibo pa cambia di sistema, cualkier cu bo usa, bo ta obliga di deal cu e realidad di mercado, cu ta subi y baha, ta contento ora prijs baha y ta zundra ora prijs subi; esey ta asina na tur parti di mundo.
Den e asunto aki, y mirando e multiple problemanan cu tin riba tereno economico y financiero, lo ta bon pa gobierno concentra riba e problemanan real cu nos tin, y laga e intento di mima hende aki un banda.
