Ayera durante un conferencia di prensa di 45 minuut, directora di Oficina di Turismo di Aruba (ATA), Ronella Tjin Asjoe-Croes a papia den nomber di e institucion aki pa defende e maneho cu nan ta hibando durante e ultimo 5 aña cu ATA a bira uno independiente. Pero fundamentalmente pa sali dilanti riba e diferente “alegacion” di pakico Ahata a retira su tres miembronan di e hunta di supervision di ATA, diaranson ultimo.
E alegacionnan cu a sali publica den media y cu directora di ATA a considera como di “hopi speculacion” tin di haber cu un eventual falta di confiansa, diferencia riba maneho di ATA, decision sin aprobacion di e hunta menciona, cu eventualmente a produci cu Ahata a retira su miembronan fei hunta di supervision di ATA.
“Nos ta sinti cu tin hopi speculacion. Y speculacion cu ta atacha maneho, credibilidad di ATA como aparato, pero tambe di individuonan incluyendo mi persona tambe. Mi ta kere cu ta cosnan cu nos mester tuma na serio y nos ta tuma na serio…”, el a bisa.
All Inclusive
Sra. Tjin Asjoe-Croes a confirma cu Ahata a manda un carta caminda nan ta expresa cu nan ta retira nan miembronan, pero nan no ta specifica e motibo pa esaki. Directora di ATA no ta kere cu nan tin di haber cu e alegacionnan cu a sali publica, ya cu te ultimo momento te hasta den e ultimo conferencia di AME (Aruba Meets Europe) cu a tuma luga siman pasa, palabra di elogio ATA a ricibi di parti di e director di Ahata pa e trabou y maneho cu nan ta hibando pa nos turismo.
E ta kere cu eventualmente e situacion aki a surgi pa e diferencia cu ta existi rond e ley di All Inclusive, pero el a laga sa cu a pesar di e diferencia di opinion cu por existi entre partidonan, entre nan, ATA y Ahata, nan a sigui colabora estrechamente cu otro, a base di principio di “business as usual”.
E ta reconoce cu ATA su afan pa keda obhetivo y trece informacion riba e proceso cu ta canando di All Inclusive ta un tarea “hopi dificil, mirando tanto speculacion y diferencia di opinion”.
Hunta di Supervicion
Directora di ATA a bisa cu e miembronan di ATA su hunta di supervision di 7 miembro (3 di Ahata, 3 di gobierno y 1 presidente cu nan ta eligi entre nan mes), tin un tarea hopi importante, caminda nan ta participa den e proceso di aprobacion di ATA su maneho financiero, strategianan y plannan. El a bisa cu nada ta wordo haci sin aprobacion di nan. Ademas ATA tin un proceso di audit riguroso di instancianan independiente y acredita.
Aunke ATA lo por sigui opera actualmente cu 4 miembro di e hunta di supervision, esaki no ta e condicion ideal, el a bisa. Nan a pidi dos abogado pa mira con e situacion cu a presenta ta hinca den otro den e ley di ATA Sui Generis. Sinembargo den e mesun ley no ta cla si ta wordo considera como mayoria e mita plus un miembro. P’esey e ta spera cu Ahata lo por reconsidera su decision como Ahata, lagando un banda cualkier diferencia eventualmente riba e topico controversial di All Inclusive, pa asina bienestar general por prevalece.
Dialogo
Sra. Tjin Asjoe-Croes a bisa cu nan lo sigui dialoga, pasobra e participacion di Ahata den e hunta di supervision ta importante como asociacion cu ta representa e sector hotelero na Aruba, ya cu pronto nan lo mester trata asuntonan importante manera presupuesto 2017, update di ATA su plan di maneho pa 4 of 5 aña cu ta finalisa na 2017. Pa tal motibo el a sigura cu ATA mester un hunta di supervision completo y pa bienestar general prevalece cu ta maneho di ATA y maneho di turismo. “Mi ta spera cu e impasse aki yega su punto final hopi pronto”, directora di ATA a bisa.
Mientras cu awe mainta ta wordo convoca un conferencia di prensa, caminda presidente di hunta di supervision, Sr. Jossy Laclé lo trece nan posicion relaciona cu e asunto aki.
