Fiscal General William Barr a bisa ayera cu e ta spera di entrega un version redacta di e reporte di investigacion Trump-Rusia di consehero special ‘dentro di un siman’ mientras el a defende su maneho di e documento.
Barr a bisa miembronan di congreso na su prome presentacion en publico desde cu a ricibi e reporte di consehero special Robert Mueller, cu su proyeccion anterior di entrega un version pa mita di april ainda ta valido. E reporte di casi 400 pagina ta wordo revisa awo pa elimina informacion di hurado y detayenan relaciona cu investigacionnan pendiente.
E redaccion lo ta codifica cu color y compaña pa notanan splicando e decision di sconde informacion, el a bisa.
Democratanan a critica maneho di Barr pa cu e reporte, bisando cu nan tabata preocupa cu un resumen di su conclusionnan principal, cual el a entrega luna pasa, tabata presenta e hallazgo di e investigacion den un forma demasiado faborabel pa presidente Donald Trump.
E resumen, un carta di 4 pagina, tabata bisa cu Mueller no a haya un conspiracion criminal entre Rusia y socionan di Trump, y cu Barr no tabata kere e evidencia den e reporte tabata suficiente pa prueba cu e presidente a obstrui husticia.
Barr a wordo yama na congreso pa papia tocante e peticion di presupuesto di su departamento, pero e legisladonan a puntra tocante e reporte di Mueller. E comentarionan di apertura di Barr a enfoca riba peticion di presupuesto pa inmigracion y e lucha contra crimen violento y adiccion na opioide, sin menciona e reporte en absoluto.
Democratanan a haya un rabia cu Barr a redacta material di e reporte y frustra cu su resumen a duna un narrativa di Trump prome cu nan a logra mira e version completo. Nan ta exigi e reporte completo y tur su evidencia, maske Trump y su aliadonan Republicano ta luchando contra esaki.
Desde cu a ricibi critica di e democratanan, Barr a defende, of sikiera splica, su proceder. El a bisa cu no tabata su intencion pa su carta ta un ‘recuenta exhaustivo’ di su trabou y cu e no por entrega inmediatamente e reporte completo pasobra e ta inclui material di gran hurado y otro informacion sensitivo cu mester wordo redacta.
Probablemente e lo wordo pidi pa duna cuenta durante un audiencia awe relaciona cu presupuesto.
Barr lo testigua tocante e reporte mes na un audiencia apara dilanti congreso y e comite dianan 1 y 2 di mei proximo.
