Den nos edicion di ayera nos a caba di comenta e guera informativo entre ministro y AHATA. Mientras tanto e guera di aviso a profundisa den un guera berdadero, cu retiro di e tres miembronan representando AHATA den e directiva di Aruba Tourism Authority (ATA). E directiva ta consisti ainda di tres miembro nombra pa gobierno y e presidente nombra pa e seis miembronan conhuntamente. Cu e paso aki, e guera entre e ministro encarga cu turismo y AHATA a profundisa mas, te na un grado cu por tin consecuencia grandi pa e forma di cooperacion den futuro. Den nos edicion di ayera nos a comenta exactamente riba esaki, bisando cu e ministro por gana e bataya aki, pasobra e ta conta cu e mayoria comodo den Parlamento pa forsa un decision, pero cu esaki lo tin consecuencia grave pa e forma di traha cu e sector. Nos no por a anticipa cu menos di 24 ora despues e situacion lo tabata asina grave.
Kico e consecuencia ta pa ATA mes lo keda por lo pronto como un pregunta. Si remedia e situacion, AHATA por designa tres persona atrobe pa drenta den e directiva. E reglanan statutario di ATA ta prescribi cu AHATA tin e derecho di nombra tres persona den directiva y e retiro actual no ta cambia nada den e obligacion pa ATA tin e tres puestonan debidamente ocupa. Banda di e retiro tin comentario ta circula cu lo tin un cierto malcontento cu e metemento di e ministro directamente den e directiva y den operacion diario di e institucion. Esaki sinembargo no ta parti di loke a divulga oficialmente di banda di AHATA, pero lo no ta straño ni unico pasobra e estilo di ‘caudillo’ aki no ta algo cu e ministro aki so ta demostra.
Pa colmo e ministro a haya noticia di Camara di Comercio cu nan ta mantene nan apoyo na e iniciativa pa bin cu un “cooling off period”, pa por yega na un ley mas balansa, algo cu e ministro a pidi e institucion pa revoca, presion cu a pone riba ATIA tambe. E reaccion aki ta logico, mirando e tactica publicitario di e ministro, cu na mas cu un ocasion ta reuni cu un organisacion y ta core sali pafo y bisa prensa cu e reunion a bay tal y tal, tumando e libertad pa papia na nomber di e partner cu cual el a caba di reuni. Esaki semper ta pone e otro instancia den un situacion incomodo pa bay desmenti loke e ministro a duna como version di e reunion. E carta cu KvK a manda pa e ministro pa pone bon na altura kico ta e posicion berdadero ta na su luga, pa descurasha e manera di actua di e ministro aki cu esnan cu ken e ta reuni. E ta un ehemplo tambe con e actitud di tenta di e ministro ta bira contra su mes. Den henter e asunto e actitud aki ta un problema adicional innecesario; e problema ta basta dificil y complica riba su mes caba.
Ta lamentabel cu na e momento aki e partidonan ta mas leu di otro cu nunca, mientras no tin otro caminda cu keda busca un base comun pa por actua na bienestar di Aruba. Kico e base comun ey mester ta? Parcialmente por bisa cu e base t’ey caba: practicamente tur hende ta di acuerdo cu algo mester sucede pa para un desaroyo cu ta hiba nos na un situacion di mayoritariamente all-inclusive den sector hotelero. Frena desaroyo di all-inclusive ta implica di un of otro manera limita e forma di opera un hotel, sin mas. Y ta p’esey tambe cu e medidanan cu ta bay tuma mester ta bon pensa pa respeta mas tanto cu por e libertad di un empresa pa dicidi pa su mes con e ta opera. Mas cu tur cos, mester evita cu gobierno, y sigur e nivel politico (ministro) tin un poder di decision directo na nivel di empresa y sigur si nos tuma na cuenta e estilo autocratico cu varios di nos ministronan ta demostra. Con esaki lo mester keda concretisa den ley, ta dificil pa bisa den detaye, ta p’esey e ta un materia asina dificil. Y esey ta exactamente loke ta duna un base di apoyo na e punto di bista cu no mester core pasa e ley aki manera cu e ta, pero tuma tempo pa construi algo miho y duradero. Legislacion mal pensa y mal ehecuta nos tin na cantidad caba y den un asunto asina importante pa Aruba su economia, miho pensa dos, no, dies biaha, prome cu core actua den pura.
Cu tur esaki nos a yega na un situacion cu menos cu nunca ta duna oportunidad pa logra e solucion balansa cu nos mester. Aruba realmente no ta Punta Cana, y sigur no Jamaica. Nos tin un sector di servicio bon desaroya cu derecho di existencia cu cual mester tene cuenta. Pero nunca bulldozer lo por reemplasa dialogo y ta resulta dificil pa e mandatario comprende esaki.
