Isha Tapias-Kock, specialista di Producto na Aruba Tourism Authority (ATA) ta splica Bon Dia cu e proyectonan tumando luga na Eagle Beach por wel di ta finalisa entre luna di october cu november cual lo ta hopi ideal mirando cu esey ta e temporada halto di crucero. E proyecto aki ta uno hopi positivo pa Eagle Beach y den general pa locual ta e futuro turistico di nos beachnan na Aruba
Segun Sra. Kock, den e momento aki ATA a yuda cu e proyecto na Eagle Beach cual ta construccion di un Kiosco y bañonan pa e turistanan cual nan ta haya ta un concepto hopi bon. ”Nos ta haya esaki hopi necesario pa tin un opcion asina pa brinda na Eagle tambe e facilidadnan aki como tal e ta den un proceso den e momentonan aki. Nan ta trahando riba nan y como tal tur cos te ainda ta biniendo manera cu ta planea” Sra. Kock ta comenta.
Sra. Kock ta agrega cu e proceso ta pasa via Departamento di Infrastructura (D.I.P.) y pues ora cu e ta cla ta D.I.P. ta esun encarga den e parti di duna persona permiso. ”E punto di e facilidadnan aki ta pa por brinda e turistanan un caminda of luga unda nan por baña, uza e WC, refresca nan mes anto despues regresa nan crucero.” Sra. Kock ta bisa.
Den e momentonan aki ta haciendo esaki solamente na Eagle Beach na unda lo tin 2 Kiosco cu ATA ta yudando cun’e anto tin proyectonan caba manera esaki cu a pasa via gobierno y via D.I.P. ariba nan mesun cuenta locual ta esun na Arashi y na Surfside Beach. Segun Sra. Kock, ta purbando di conhuntamente yega na e comfortabilidad cu turista ta spera di un producto manera Aruba.
Ta trahando pa atrae turistanan na tur beachnan rond Aruba
”Na Arashi mi a compronde a di informacion cu nos ta ricibi, cu e permiso a wordo duna anto como tal nos ta spera cu e ta wordo habri. Esun di Surfside Beach te ainda esaki no ta e caso pues como tal no tin un persona cu tin permiso pa esey ainda. E motibo mi kier sa e no a wordo entrega te ainda na instancia nan di D.I.P. cu D.O.W. pues e ora ey nan no por haci hopi tampoco pa por yega na e lista di criterio cu ta necesario pa por entrega. E ta den proceso si anto e ta e intencion si pasobra e ta un area cu nos ta promove” Sra. Kock ta bisa.
Sra. Kock ta agrega cu ta asina ki purbando di atrae turista for di e area di Palm Beach pa pusha nan den Arashi, pone nan na Eagle Beach y trece nan na Surfside tambe. ” E parti di Eagle Beach, e idea tabata pa crea mas uniformidad den con e producto ta mustra, y como cu e otro dos nan ey tabata traha caba riba beach,e lo tabata mas facil cu nos a siña caba di Arashi y Surfside Beach pa haci esakinan mas facil cu menos gasto tambe. Riba esaki, nos tin un cierto ”look” caba cu nos a crea y nos ta purbando di mantene esaki pasobra asina e ta haci e mas facil pa turista reconoce e puntonan tambe, sinembargo nos ta habri pa cualkier otro opcion pa proyectonan cu lo bin den futuro.” Sra. Kock ta bisa.
