Fiscal federal na Boston ta buscando un manera pa caba cu spionahe economico di personanan nacionalidad Chines.
Fiscal di Massachusetts, Andrew Lelling, y assistent di Fiscal General, John Demers, a bisa diabierna cu nan a reuni cu oficialnan na companianan local y universidadnan siman pasa pa curasha nan pa trece sucesonan sospechoso di spionahe na atencion di investigadonan federal.
Demers a bisa cu Massachusetts ta enfoke di e ‘China Initiative’ cu Departamento di Husticia a anuncia november ultimo, pa motibo di su universidadnan di investigacion y companianan di biotecnologia, siguridad cibernetico y defense ta haci e ‘un ambiente rico den target’ pa Chinesnan buscando di horta propiedad intelectual.
Lelling a referi na un caso recien na su oficina. Residente di Wellesley, Shuren Qin, a wordo acusa aña pasa di conspiracion pa exporta ilegalmente aparatonan traha na Merca uza den guera anti-submarino pa un instituto di investigacion militar Chines.
