Marihuana no ta bon pa hoben menor di 25 aña

ORANJESTAD – Diabierna mainta den un conferencia di prensa, diferente instancia y profesional a papia di e tema di marihuana, sea medicinal of recreacional, pa locual ta pasando na Aruba.

Director di FADA, Juendel Sprock a bisa cu a bin cu e tema aki pa trece mas informacion dilanti. Sprock a bisa cu pa hopi tempo a tende cu cannabis medicinal tin efecto cu ta yuda. “Tin estudio internacional cu ta mustra cu e tin su beneficio medicinal cune.”

Sprock a remarca cu na Merca a legalisa esaki, y den cada estado e ta varia pa locual ta trata e reglanan. Den e caso di medicinal, sr. Sprock ta bisa cu marihuana tin varios punto cu e ta yuda cune, manera pa malesa di stoma, epilepsia, ‘riba internet tin lista di malesa cu e ta yuda’.

Sinembargo, Sprock a agrega cu FDA na Merca solamente a aproba dos remedi cu nan ta bisa ta yuda den e parti medicinal. E ta remarca cu tin diferente motibo pa esey, pero locual nan kier papia di dje ta e uzo di marihuana ‘bou nos hoben’.

Den e parti medicinal cu tin e beneficio cune, anto e parti recreacional cu tin su parti negativo, respecto hende hoben. “Den investigacion di ciencia ta mustra cu marihuana bou di hoben di 25 aña ta dañino, e ta afecta nan memoria, nan concentracion, na estudio y mas. Si nan kier a bira profesional, uzando marihuana e nivel di IQ ta baha.”

Segun Sprock cu nan caso ta importante, e ta pa hoben keda leu di uzo di marihuana. Pa motibo di diferente investigacion y mirando opinion profesional, ‘nos kier bay den detaye den e parti recreacional’. Pa nan sa kico e ta haci cerca hoben bou di 25 aña.

Sinembargo, esey no ta bisa cu ariba di 25 aña e ta bon. Sprock ta agrega cu ciencia ta mustra cu e ta daña cerebro bou di 25 aña di edad. “Localmente e uzo di nos hoben e crece, e marketing cu marihuana ta bon, medicinal, ciencia ta mustra, cu e ta legal y regula segun e regla cu ta bin cune.”

Tin caso cu mayornan ta huma. E ta agrega cu por bisa cu pa mayor ta importante pa locual e hoben ta haci, pa motibo cu mayor ta uza anto nan ta wak. Awendia, Sprock ta agrega cu ta papia di dje mas habri, e hoben ta bay uza mas, ‘e tendencia ta grandi, pero ta bruha medicinal cu recreacional’.

E proceso di remedi of recreacional. “Nos a haya fondo di e crisisplan social, pa motibo cu e problema aki tin diferente faceta cu ta bin cune, incluyendo e parti social. Tin e parti financiero cu no tin na cas, problema di gang of hende cu ta bully otro.”

Sprock a splica cu e programa nobo cu lo bin cune yama ‘Be Smart’, cu na comienso ta bay enfoca na mucha pa asina nan ta ‘mas consciente’ y yuda pa forma caracter cu nan por tuma decision corecto bou presion. Cu e Afl. 200mil cu a ricibi di Crisis Plan Social, lo hiba un campaña di cuatro modulo, cual ta humamento, alcohol, video gaming, y droga, pa asina duna guia y forma caracter a traves di e programa aki.

Psikiatria Cesar Perez Leon, di Fundacion Maneho pa Addicion di Aruba, FMAA, a bisa cu e situacion di marihuana ta un problema, no solamente na Aruba, pero mundialmente. E ta bisa cu e consumo di marihuana ta 4% di poblacion mundial, esey ta nifica cu 162 miyon habitante ta uza, 22 miyon ta uza tur dia marihuana, y 20 miyon ta adicto. E ta agrega informacion pa mira importancia di kico e ta.

Perez Leon ta bisa cu e tendencia ta basa riba legalisacion di medicina y recreacion, y esaki ta motibo cu mester tin informacion positivo. “Afo ta bisa cu gobierno a legalisa e informacion di resultado pa motibo cu no ta sinti cu ta algo malo.”

E ta continua splica cu medicinal ta den otro situacion di locual nan ta papia. Pero e realidad di legalisacion ta haci cu hende bou di 18 aña no por cumpra, mientras cu actualmente tur hende por cumpra riba mercado preto pa locual ta marihuana.

Sinembargo Perez Leon ta splica cu caminda cu ta bende ilegal, nan ta hinca diferente cosnan of kimico pa aumenta e peso, sea ‘plastic, tera, plomo’. E ta agrega cu e producto contamina por produci diferente sintoma, of te hasta daño cerebral.

E parti medicinal, Perez Leon ta bisa cu e tin riesgo experimenta ambos, tin cu traha riba structura fuerte pa implementa esey. E ta bisa cu cultivo di marihuana ta bin di afo y pa es motibo ta complica pa legalisa.

“Kico ta pasa cu un mucha den su adolescencia, sea cu 9, 10, 11 aña, su cerebro no ta suficiente desaroya cu e mester tin. Anto si e uza marihuana, su cerebro ta haya problema pa e memoria, e sintesis afectivo, inteligencia di e proceso cu nan mester pa sigui desaroya”, Perez Leon ta bisa.

Pa un menor di 21 aña cu ta uza marihuana den un manera cronico, e tin risico den su futuro cu no lo tin un carera profesional pasobra e no tin concentracion, tin problema di conducta, problema di scol y Universidad.

Sinembargo, Perez Leon ta bisa cu e esfuerso mester ta den prevencion en bes di promocion di adiccion. E ta agrega cu hende ta kere cu marihuana no ta e problema. “Mester wak e beneficio y e detrimento di legalisa. Medicinal mester tin structura fuerte, pa motibo cu e daño por ta mas grandi cu e beneficio cu ta bay haya.”

Perez Leon ta bisa cu e consecuencia cu marihuana, sea manera medicinal of cu botica ta bende, por hiba na adiccion. Remedi di botica ta pasa bou cientifico, procesa den laboratorio. Anto cu marihuana riba caya no sa kico tin aden, nan ta di caya of cualkier caminda cu e ta bin procesa. El a bisa cu 90% di persona cu ta adicto pa un droga ta pa motibo cu a cuminsa cu marihuana.