Asamblea Nacional (AN) di Venezuela a aproba ayera un acuerdo pa declara cu na Venezuela ta existi un “Estado promotor di terorismo”. E parlamento reconoci como esun legitimo a pidi organismonan internacional declara e ‘colectivonan’ grupo terorista y pa tuma medidanan corespondiente. E organismonan cu lo acerca ta Organisacion di Nacionnan Uni (ONU) y Organisacion di Estadonan Americano (OEA).
Juan Pablo Guanipa, diputado di Asamblea Nacional, a haci un yamada na instancianan internacional pa declara e colectivonan terorista, despues cu diadomingo pasa gruponan paramilitar a hostiga y agredi e habitantenan den vecindario di avenida Fuerzas Armadas, cu tabata protesta pa falta di luz y awa. Tambe Guanipa a haci un yamada pa documenta e casonan di agresion, pa despues por entama caso na Corte Penal Internacional.
Tambe Asamblea Nacional a aproba ayera, en bista di e blackoutnan cu ta sigui, un documento den cual ta urgi e Comisionnan Permanente di Contraloria, Financia y Desaroyo Economico, Energia y Petroleo, y Administracion y Servicio, como tambe di Ambiente, Recurso Natural y Cambio Climatico, e revision completo di henter e problematica di electricidad y distribucion di awa, pa cuminsa di inmediato accionnan pa yuda determina solucionnan real pa resolve e actual crisis den cual Venezuela ta pasando.”
Mientras tanto, e Asamblea Constituyente Chavista ta considera aproba pa kita inmunidad parlamentario di Juan Guaido, presidente di Asamblea Nacional, tal manera Tribunal Supremo di Husticia a recomenda. Varios politico y hurista a mustra riba e actual constitucion, cu ta bisa claramente cu ta e propio Asamblea Nacional, y no e Constituyente Chavista, so por kita inmunidad parlamentario. E regimen ta menasa di e manera aki haya un motibo pa detene Guaido, pero e menasa di banda di Merca si algo mester pasa cu Guaido ta vigente ainda.
