E director pa America di ONG Human Rights Watch (HRW), José Miguel Vivanco, dialuna pasa a pidi Ecuador pa avansa di un forma legal pa despenalisa aborto den caso di violacion.
E Congreso Ecuatoriano a analisa desde e luna di october pasa un modificacion di e Codigo Integral Penal (COIP) pa amplia e causal di aborto na e nacion cu mayoria catolico. E proyecto tambe ta inclui e despenalisacion di aborto den caso di incesto, violacion, inseminacion sin permiso y grave malformacion di e feto.
HRW ‘ta considera cu e despenalisacion di aborto den caso di violacion, cu ta propone e proyecto di ley aki, ta constitui un claro avance, y ta necesario pa Ecuador cumpli cu su obligacion huridico di derecho internacional den caso di derechonan humano”, Vivanco a bisa a traves di un video conferencia na e Comision di Husticia di Asamblea Nacional.
E comision ta encarga di elabora un informe nobo di un serie di reforma legal cu ta inclui e despenalisacion di aborto den caso di violacion. E reporte mester ta presenta pa e di dos y definitivo debate na e legislativo, cu no tin un plaso determina pa convoca pa un votacion di e tema.
Actualmente. e ley Ecuatoriano ta permiti muhenan aborta ora e embaraso ta implica un risico pa e bida di e mama, of ora e ta producto di un violacion di un muhe cu incapacidad mental.
E director pa America di HRW a argumenta cu ‘e prohibicion di aborto den caso di violacion ta hiba hopi muhenan pa tin aborto insigur, y ta aumenta e cifra di mortalidad materno na e pais’.
