E crisis na e pais ruman Venezuela ta yegando na un point of no return’. No ta e situacion politico riba su mes, pasobra hopi pais riba e continente aki a biba situacionnan dificil cu disturbio riba caya, bataya entre polis y studiante y obrero, toque de queda y finalmente, masacre pa forsanan di siguridad ora no ta mira un salida mas. Asina na 1968, poco dia prome cu e Weganan Olimpico di Mexico a cuminsa, un demostracion anti-gobierno di studiante riba un plaza grandi den Ciudad de Mexico a bira e escenario di un matanza, conoci como e ‘Matanza de Tlatelolco’, unda forsnan di siguridad a seya salida di e plaza y a mata un parti considerabel di e presentenan. Por lo menos 300 persona a muri den un di momentonan mas scur di historia di Mexico.
Pero no tabata trata di un situacion di crisis y destabilisacion den henter e pais. E resto di e enorme teritorio Mexicano tabata den relativo trankilidad na mes momento. Kico ta haci e horcan na caminda na Venezuela asina diferente? Pa cuminsa, tin un situacion politico di confrontacion generalisa den e pais. Te na e momento aki no ta asina cu por papia di un confrontacion violento, cu uzo di arma na tur dos banda. Ainda tin un situacion cu ta (trata di) respeta e organo di democracia parlamentario. Cuanto tempo esey ta bay keda asina, ta un di e preguntanan grandi.
Loke mas ta capta atencion no ta e situacion politico, sino e situacion di acceso na cuminda y producto basico. Loke ta haci diferencia ta e situacion, unda un di e paisnan mas rico na materia prima y recurso agricola enorme, a yega na e punto cu produccion industrial y di agricultura a paralisa pa un gran parti. E unico recurso cu tin e pais a flote ta su produccion di petroleo, y esey tambe ta un pregunta grandi cuanto tempo esey ta wanta ainda. E placa cu petroleo ta trece aden ta bay mas y mas na importacion di cuminda y otro necesidadnan basico cu e pais ya no ta produci.
E desabastecimiento a bira caba di tal grado, cu simplemente no tin suficiente cuminda disponibel pa satisface necesidad di mas di trinta miyon hende. Den interior, unda acceso na cuminda ta mas facil, e situacion ta menos dramatico, pero den e ciudadnan e situacion a cuminsa bay for di man caba, cu sakeo den tienda y supermercado na orden di dia.
Na e momento aki por observa, cu e situacion a pasa di scarsedad pa simpel ausencia di cuminda, y cu consecuencia: hamber. Un factor cu no ta toca solamente esnan anti-gobierno, pero tambe un parti grandi di esnan cu algun aña atras a yuda Nicolás Maduro bira presidente. Un factor nobo cu ta dificil di ignora y di remedia, ni si e hostilidadnan politico para awor mes. Pa cuminsa e pais mester tin e recursonan financiero pa importa cuminda, ya cu aumenta produccion nacional ta un kestion di mediano plaso: si bo sembra awe bo no ta cosecha mañan. Fuera di esey e capacidad portuario Venezolano ta conoci pa su lentitud y capacidad limita pa maneha carga cu ta drenta.
Pa duna un impresion di con grave y unico e situacion ta, nos por haci un comparacion cu e crisis cu e gobierno Sandinista tabata aden na Nicaragua, na 1989-1990, poco prome cu nan a entrega poder. Tabatin un situacion di crisis politico, di cansancio di e guera den interior entre e contrarevolucionarionan y e gobierno izquierdista lidera pa Daniel Ortega. Tabatin cierto scarsedad, pero mas bien di producto importa cu Nicaragua no tabata produci. Pero… nunca tabatin falta grandi di producto agricola basico. Apesar di e confrontacion militar den parti di e pais, cuminda no tabata e problema grandi. Asina mes, e gobierno revolucionario a consenti pa termina e guera, tene eleccion liber cu riesgo di perde, pasobra nan tabata considera e situacion como sin perspectiva.
Den e eleccion di april 1990 e union di forsa politico anti-sandinista a gana eleccion cu un mayoria, cu no tabata asina aplastante manera e derota cu Nicolás Maduro a sufri na december 2015 na Venezuela. E Sandinistanan a logra mantene un 42,5% di e total di voto. Nan a entrega poder politico, a mantene un gara solido riba ehercito, y a logra despues bolbe den gobierno, unda nan ta ainda, despues di e desaster (di corupcion) cu e gobierno supuestamente ‘democratico’ a haci den e pais.
Venezuela ta bibando momentonan extra ordinario di un combinacion di confrontacion politico hopi fuerte, cu a bira mas serio pasobra, otro cu e Sandinistanan, e Chavistanan no kier reconoce cu nan tin un mayoria grandi di e poblacion contra nan. Mientras tanto, e factor hamber a cuminsa tuma rienda di e pais y, mescos cu virus y bacteria, e no conoce color politico. Nos ta cerca di e momento cu desesperacion ta tuma mando y anto no lo tin ehercito ni polis cu por pa impedi cu pueblo ta tuma ley den nan mes man, cu caos como consecuencia. E ora Cero ta yegando…
