Sikiera 20 morto resulta despues di un candela na un bus di transporte interprovincial na un terminal di un districto na nort di Lima, den oranan di anochi di diadomingo ultimo, un di e pio accidentenan masivo cu a registra na e capital Peruano den ultimo dos decada.
“E candela a genera e morto di sikiera 20 persona”, Lewis Mejía, oficial di e Cuerpo di Bombero a indica. Nan a yega prome na e terminal Fiori na e districto limeño di San Martin di Porres.
E stacion di terminal Fiori, cual tabata opera ilegalmente, a ser clausura pa e autoridadnan municipal na januari di 2018 pa motibo di e benta clandestino di combustibel pa vehiculonan di transporte publico.
Segun e prome reporte, e candela a cuminsa pa via di un faya electrico den e parti patras di e vehiculo, cu tabatin plania pa sali pa e ciudad di Chiclayo, na nort di Peru.
Te ainda no ta conoci e number di pasahero herida, por ta casi un dozijn, cu a wordo traslada di biaha pa e hospital cercano Cayetano Heredia pa e servicio di atencion medico di urgencia (SAMU).
Personanan cu tabata pasa cerca di e luga di e suceso a describi escena di panico y gritamento di teror.
Defensa Civil a informa riba su cuenta di Twitter, cu e ‘bombero y personal di polis a termina cu e candela’, e personal di rescate a haci e luga limpi pa loke a keda di e bus, autoridadnan ainda no a revela e cantidad di persona cu tabata den e bus.
