ORANJESTAD – Recientemente a tuma nota cu algun compania a tuma e paso di notifica nan clientenan cu pa motibo di decisionnan di gobierno nan lo bay aumenta nan prijs di graniet y casi triplifica esaki.
Gobierno di Aruba a acerca un di e companianan aki pa splicacion pa cual a resulta cu tabatin un mal comunicacion. E compania a indica cu nan a wordo bisa cu aki tres luna nan no mag di coba santo of kibra piedra mas aki na Aruba. Pa cual a splica nan cu esaki no ta e berdad y cu gobierno kier pa den un periodo di dos aña yega na e punto caminda cu no ta sigui coba, pa motibo di e daño cu ta wordo haci na nos medio ambiente. E situacion cu Aruba ta aden no ta un secreto, por mira casnan menos cu 10 meter leu for di buraconan di 70 meter profundo cual ta un situacion hopi peligroso. E fase di transitorio a cuminsa desde december 2018 y gobierno lo acerca e otro companianan.
Mientrastanto e compania a manda un e-mail informando nan clientenenan lo no aumenta nan prijs desde prome di april mas na e suma cu nan a pone, y al contrario nan lo contribui na economia di pais Aruba. Den e e-mail aki tambe e compania a menciona cu nan ta respeta e derecho di contratistanan chikito cu ta opera e trucknan.
