(CaribischNetwerk) – Segun e medio digital Caribisch Netwerk ta existi duda encuanto e ayudo cu Aruba lo por haya di parti di Union Europeo pa combati gastonan cu e teritorio lo tin cu refugiado Venezolano. Algun siman pasa un delegacion parlamentario di Aruba bao guia di presidente di Staten mr. Ady Thijsen a biaha pa Hulanda y Belgica, unda a bay papia di ayudo Europeo pa Aruba. Despues di e bishita na Comision Europeo e delegacion, cu tabata consisti tambe di e lidernan di fraccion di MEP, RED y AVP, lider di fraccion di POR no por a biaha pa motibo di salud, a anuncia na prensa cu Aruba lo por haya concretamente 6 miyon euro pa e aña aki y 10 miyon euro pa otro aña.
Segun Caribisch Netwerk preguntanan haci na Bruselas a indica cu representantenan di Comision Europeo ta mustra reserva tocante e asunto y ta bisa cu sigur no a papia di suma. E Comision lo ta en espera ainda di e plan concreto cu gobierno di Aruba lo mester entrega, pa por evalua esaki y despues tuma un decision.
Pa basta tempo caba tanto Aruba como Curaçao ta den deliberacion cu Hulanda, y recientemente tambe cu Union Europeo, pa haya fondo pa atende e, segun e gobiernonan insular, creciente problema di refugiado Venezolano. Te na e momento aki gobierno Hulandes a mustra bastante reserva riba e deseonan di Aruba y Curaçao pa haya ayudo pa atende e situacion.
Nota di Redaccion: E noticia aki tin algo di logica, den e sentido cu cualkier persona cu conocimento di e manera di traha di Union Europeo por bisa cu no ta usual pa haci compromiso di suma di placa, sin cu ta trata di un plan concreto, entrega pa un gobierno, no pa un delegacion parlamentario.
