ORANJESTAD – Actualmente a surgi un situacion di emergencia den e asunto di refugiado (politico) Venezolano na nos isla. E problema di malcontento entre esnan deteni na Guarda Nos Costa a termina cu un cierto cantidad di persona cu ta liber pero mester meld pa confirma nan presencia. Ayera a bin acerca e descubrimento di un negoshi cu tramitacion di documento pa refugiado cu ta desea di pidi status di asilo politico. Den e negoshi aki ta trata di cobransa di por lo menos Afl. 1500 pa cuminsa e caso.

E negoshi ta cu e persona ora e drenta por duna di conoce na inmigracion cu e ta busca asilo politico. Mayoria di e personanan aki tin miedo di ser manda pa nan pais anto nan ta prefera di drenta y sconde y ora nan ta sigur na e isla nan ta bay busca informacion di kico tin cu haci pa por haya e permiso.

Un hoben Venezolano a yega Aruba anto e mester a paga Afl. 1500, supuestamente na un abogado cu ta esun cu lo a traha e documento di peticion. Riba e imagen riba e pagina aki por mira copia di e peticion. Despues di paga supuestamente den un par di siman e lo mester haya e aprobacion di su asilo.

E hoben a splica cu a pesar cu e tin su papel, e no ta sinti su mes sigur. Riba e documento tin stempel di Dimas, pa confirma recepcion, y ta dirigi na e directora di e departamento. Bon Dia Aruba no a logra haya e resto di e documnto, ya cu obviamente esaki no ta e unico pagina di e peticion.

Mayoria di e personanan cu a cumpra un documento manera esaki, igual cu e persona cu a provee e copia aki, ta cana rond cu e documento pensando cu esey por preveni deportacion. Sin embargo, esey no ta sigur pasobra e papel aki riba su mes no ta garantisa nada. E negoshi ta keda den man di e tramitador den e caso aki, mientras e persona cu a paga su bon placa realmente no sa unda e ta para.

Diahuebs mainta den un investigacion andando pa varios luna a detene un persona bao sospecho di ta traha e tipo di documento aki pa haci peticion pa asilo politico, asina vocero di cuerpo policial Lito Lacle a duna di conoce.

E homber aki lo a traha papel pa un gran cantidad di hende cu supuestamente lo por haya asilo politico y e lo a priminti nan cu nan lo haya trabao tambe. A detene e persona, pero lo continua cu e investigacion; a confisca diferente material cu mester mas investigacion. Probablemente lo bay detene mas hende tambe, tabata e mensahe.

Segun sr. Lacle a entrega mas di 20 keho contra e persona G. cu a ser deteni. Agregando cu e ta keda bisa e personanan cu nan papel ta den proceso “anto no tin nada den proceso.” Sr. Lacle ta bisa cu aparentemente e ta djis tuma placa for di hende y ta traha un papel pa hende kere cu tin un peticion.

Sin embargo, sr. Lacle ta bisa cu mas keho nan tin miho esey ta. E ta bisa cu e problema por ta hopi mas grandi y cu mayoria di caso no ta cuadra cu berdad y no tin un peticion den proceso. “Nos ta pidi hende cu ta kere cu nan papel ta den proceso pa entrega keho, tin posibilidad cu lo bin mas detencion.”

Bon Dia Aruba a yama DIMAS pa por haya un splicacion con e peticion tin un stempel cu por ta berdadero of por ta trata di falsificacion, y dependiendo di esey si tin un peticion berdadero entrega pa pidi asilo. E documento cu Bon Dia Aruba a logra haya tin tambe un stempel y number cu ta coresponde cu administracion di Bureau Interne Diensten (BID) unda supuestamente e documento a ser ofreci pa keda registra ey tambe. Nos no a logra haya un contesta di Dimas.

Nota di redaccion: Loke ta mas sobresaliente den e caso concreto aki, si e peticion ta entrega si of no na Dimas, ta e calidad horible di e Hulandes den cual e peticion ta skirbi, te tal grado cu muy probablemente nunca por otorga un permiso pa asilo a base di un documento di e calidad pesimo aki. Nos lo sigui e acontecimentonan den e caso aki cu atencion.