ORANJESTAD – Tin un cantidad di vacaturanan habri pa specialistanan medico riba nos isla. E situacion aki ta haci cu e lista di spera di pashentnan ta bira mas largo pa nan haya atencion specialisa. Minister di salubridad publico, Dangui Oduber a declara na Bon Dia Aruba cu for di aña pasa nan ta atendiendo cu e problema aki. El a expresa su preocupacion y tambe su prioridad pa percura un solucion permanente.
E mandatario ta spera cu denter di poco e por haya claridad di parti di hospital, kico tur a haci desde cu a wordo haci palabracion aña pasa pa yena tur e vacaturanan habri. “Si esey no ta e caso, gobierno lo sa di tuma accion, pasobra nos cuido di nos hende ta na prome luga,” el a declara na e matutino aki.
El a laga sa cu den mas di un ocasion a wordo duna instruccion na hospital pa atende cu e problema di falta di specialistanan. E situacion aki ta afecta nos cuido di salud, y e ta ocasiona un lista di spera enorme. Oduber a indica cu e maneho di su ministerio ta dirigi pa baha e lista di spera. Pero tambe pa reduci e tempo di espera na momento cu un persona mester un ayudo na departamento di emergencia.
E hoben mandatario a señala cu niun rato nan kier crea panico den comunidad. E ta afirma cu nos sistema di salud ta funciona. Logicamente tin retonan manera tur otro pais, y nan ta atendiendo cu e retonan aki. Sigur e por manda un mensahe di trankilidad pa comunidad henter, cu su persona como minister di salud ta haciendo tur su maximo esfuerso pa atende cu tur e problemanan y garantisa un cuido na tur momento.
E ta lamenta cu Dr. Jonkhoff mester a entrega su retiro. El a splica cu tabatin un situacion di hopi tension entre e relacion di su persona cu gerencia di hospital. Oduber a remarca cu e specialista oncologo aki a yega na su edad di pension tambe. Ya caba nan a busca oncologonan, y nan ta buscando dos oncologo permanente. El a divulga cu tin un studiante Arubiano cu ta specialisando na Hulanda, y otro aña e ta cabando, y e lo bin Aruba pa bin yuda riba e tereno aki.
