Varios pais miembro di Caribbean Community (Caricom) a vocifera nan desaprobacion di e encuentro cu cuatro di nan miembronan tabatin siman pasa cu presidente Donald Trump na Florida.
Un di esnan cu mas rabia a expresa pa e encuentro ta prome ministro Ralph Gonsalves di St Vincent & Grenadines. Gonsalves a bisa cu e encuentro na Florida no tabata den linea cu e acuerdo dentro di Caricom pa loke ta e situacion na Venezuela. Caricom conhuntamente a uni su mes na e iniciativa di dialogo di Montevideo, unda varios pais di e continente y di Union Europeo ta busca alternativa no arma pa e problema Venezolano.
E mandatarionan cu a reuni cu Trump tabata prome ministro Allen Chastanet di St Lucia, prome ministro Dr Hubert Minnis di Bahamas, prome ministro Andrew Holness di Jamaica y presidente Jovenel Moise di Haiti, tur miembro di Caricom, hunto cu presidente Danilo Medina di Republica Dominicana.
E disputa ta parce di tin di haci tambe cu e intentonan di China pa penetra den e region, cu Estadonan Uni ta considera nan ‘backyard’. Trump a ofrece un plan di suministro di gas natural na prijs atractivo, como contrapropuesta pa e programa di subsidio di petroleo di Chavez y Maduro, cu no tin tanto perspectiva mas actualmente.
Prome ministro di Antigua & Barbuda a declara cu “e ironia di tur esaki ta cu Overseas Private Investment Corporation (OPIC; un entidad di inversion Mericano) ta opera caba den e paisnan aki, ademas, e Chinesnan ta ofrece miho condicion: prestamo di 20 aña na 2% cu un moratorium di 5 aña.”
Di otro banda, prome ministro di Jamaica, Andrew Holness, a mustra optimismo pa e plan di presidente Trump.
