Amazon ta dunando placa pa amplia aceptacion di Inteligencia Artificial (AI). E gigante di comercio cibernetico a bisa ayera cu ta trahando cu e US National Science Foundation pa compromete te hasta $10 miyon cada un den donacion pa investigacion durante e proximo tres aña, pa yuda mehora husticia den inteligencia artificial.
“Nos ta kere nos mester traha di cerca cu investigadonan academico pa desaroya solucionnan innovativo cu ta duna atencion na problemanan di husticia, transparencia y responsabilidad, y pa sigura cu parcialidad den data no wordo hinca den e sistemanan cu nos ta crea”, Prem Natarajan, vice presidente y hefe cientifico di Alexa na Amazon, a skirbi riba un blog. “Proyectonan financia lo yuda permiti aceptacion amplio di sistemanan AI, yudando Merca capitalisa mas riba e potencial di tecnologia AI.”
Esaki ta yega mientras Amazon ta enfrenta critica pa bende Rekognition, un software di reconocemento di cara cu ta depende riba AI y siñamento di mashin, na agencianan di cumplimento di ley. Gruponan di libertad civil, manera ACLU, a menciona preocupacion pa e adopcion rapido di tecnologia di reconocemento di cara entre agencianan di cumplimento di ley Mericano, y e potencial pa su abuso, particularmente contra inmigrantenan y hende di color.
Amazon a bisa cu topiconan di interes especifico pa su programa cu NSF ta inclui transparencia, splicabilidad, responsabilidad, parcialidad potencial y su posibel efecto, inclusividad y husticia den tecnologia AI. Investigadonan interesa por entrega nan carta di intencion prome cu dia 10 di mei proximo.
