ORANJESTAD – Durante fin di siman a tuma luga Arubadag cu e aña aki a kibra tur expectativo. No solamente a pone un record na e cantidad di participante despues di hopi aña, sino tambe, a reduci costonan pa organisa e evento.

Gabinete Wever-Croes, pa di dos aña caba ta brinda e comunidad Arubano, pero tambe nos rumannan di Corsou y Boneiro biba na Hulanda un bunita festival pa celebra Aruba su Himno y Bandera.

Minister plenipotenciario Guillfred Besaril a duna di conoce cu e aña aki, a reduci gasto cu por lo menos 20 % compara cu aña 2018. E meta ta pa otro aña sigui reduci e gastonan mas ainda. Gastonan pa artistanan invita tawata menos cu aña pasa danki na e hecho cu a bin ta traha for di aña pasa september riba e evento. Aki a haya cooperacion di diferente promotornan Hulandes, pues bahando e peso final di e gastonan di ArubaDag pa gobierno.

ArubaDag no ta un concierto manera a pasa den e gobernacion anterior sino un manifestacion cultural. Pa cua motibo e entrada a keda na 25 Euro pa persona na porta cu un prebenta na diferente prijs cu tabata menos cu esaki. Den combinacion cu un mercadeo sumamente agresivo a logra na yena un Ahoy cu mas di 6000 hende cu a bin pa disfruta y manifesta nan amor patria pa Aruba. Na final ta esunnan cu a paga pa dentro, ta esunnan contribuyente cu a cubri mayoria di e gastonan di e celebracion di ArubaDag.

Un programa cu a cuminsa y a wordo dedica na cultura di Aruba, incluyendo cumindanan y cos dushi tipico Arubano. Tambe tawata tin un seccion cu a duna esunnan presente e sentimento di ta den un centro di bario, cu weganan popular conoci y masha gusta na Aruba manera; bula den saco; core cu webo den cuchara entre otro. E premionan pa e participantenan tambe tawata un gesto di cariño, nada caro pero bunita, entre otro a duna pandushi na esunnan cu a participa y a sa di gana. Tur esaki a duna nos Arubanonan na Hulanda e sentimento cu ta na Aruba mes nan ta celebrando un 18 di maart.

E bandanan tipico tanto di Aruba como Hulanda y e gruponan di baile tambe a contribui grandemente na e sentimento aki. Anochi a cera cu gruponan popular di Aruba y Hulanda cu a pone e publico riba pia pa gosa di forma magno di e celebracion aki.

Pa loke ta trata prensa, apenas 7 miembro di e gremio aki a ricibi un invitacion pa cubri e evento. Contrario cu loke tawata pasa cu e gobierno anterior, caminda te hasta prensa skirbi y cierto “Free-Lancers” amigo di nan tabata ricibi invitacion cu tur gasto paga. Pues aki tambe a baha gasto formalmente. Por bisa si cu prensa na Aruba su interes y importancia cu ta duna na ArubaDag ta hopi grandi, por lo tanto tabata un grupo cu a bini e aña aki riba nan mesun forsa Hulanda pa cubri e evento completo.

ArubaDag ta e celebracion cu Aruba y gobierno ta brinda na nos hendenan cu ta studia y/of pa otro motibo manera salud of trabou, ta residencia na Hulanda. Di e manera aki, ta tene nos cultura tur aña den nan mente y curason pa semper nan keda cu e gana di un dia regresa nan pais.