ORANJESTAD – Gobierno ta den spera di un cambio di ley pa loke ta trata asunto di asilo politico cu ta data for di 2009. Tanten minister di husticia Andin Bikker a dicidi di bin cu un maneho anticipatorio cu a keda publica for di ayera pa loke ta e casonan di aplicacion pa asilo. Mirando cu pais Aruba ta mara na tratado di refugiado tin cierto rekisitonan; y e rekisitonan aki ta wordo reforsa.

E ley aki pa loke ta tratamento pa asilo politico lo conoce cambio debi na aumento di solicitud di asilo na Aruba, esaki despues cu e crisis interno na Venezuela a bira pio. Aworaki cu e frontera cu Venezuela ta cera, esey a trece cune un disminucion di Venezolanonan cu intencion di keda na Aruba bou e pretexto di refugiado.

Segun e mandatario, nos pais a conoce un aumento hopi drastico for di december te mita di februari, di hendenan cu na su yegada Aruba ta meld pa asilo. Pero aworaki nos no tin e casonan aki mas. Mas bien e casonan cu nan ta bin hayando ta di e personanan cu ta na Aruba pa varios tempo caba. Nan ta persona cu a keda deteni pa Guarda Nos Costa, trahando ilegalmente, y di repenti nan ta bira personanan cu mester di asilo, e mandatario a bisa.

Maneho
Un rekisito cu a keda introduci den e maneho nobo aki tin di haber cu unabes bo ta yega Aruba, inmediatamente mester duna un agente di migracion e motibonan di bo solicitud di asilo. Bo mester yena un formulario unda bo mester duna argumento pa kico bo ta kere cu bo bida por core peliger, si bo ta wordo manda pa bo pais di procedencia. Nan ta haya un meldplicht of compromiso pa reporta na e autoridadnan competente cada periodo di tempo na Aruba, tanten nan ta evalua cada caso di asilo individualmente.

E di dos maneho cu a keda introduci ta cu bo mester haci aplicacion den persona. Y no haci uzo di tercera persona cu e minister a cualifica di ‘semi huristanan’ cu no ta cay bou supervision di corte comun ta gaña persona cobrando sumanan pa manda carta pa haci apelacion riba asilo. ‘Nan ta probecha di e vulnerabilidad di e personanan akinan,” el a bisa.

El a bisa cu e carta cu ta wordo duna dor di ACNUR of instancia di Nacionnan Uni pa asunto di refugiado, no tin validez si no ta debidamente procesa cerca nos autoridadnan of instancia oficial.

Den diferente reunion cu gobierno a sostene cu ACNUR, nan a wordo poni na haltura cu mirando e tratado cu ta uno ‘duidelink y rigido’, nan no tin autoridad pa duna e tipo di carta aki. Nos leynan y e tratado ta hopi cla, ya cu e ta papia di autoridadnan concerni. Den nos caso local e autoridadnan aki ta Migracion Aruba y DIMAS. Mientras cu nan ta dunando e impresion cu e carta di UCNUR ta den nomber di pais Aruba, locual no ta berdad. Ya cu automaticamente e tratado ta referi na autoridadnan oficial di un pais. Segun e minister di husticia, te siman pasa nan a bin haya un lista di esnan cu ACNUR a duna un tipo di declaracion asina.

“Si nos no sa kende a haya un carta di ACNUR, nos no por tene cuenta cune,” el a bisa.

Den e maneho nobo ta wordo bisa tambe cu esun cu ta haci un aplicacion di asilo no personal sino pa tercera persona of via organisacion internacional, nan ta duna e aplicacion aki e criterio di ‘intencionnan.’ Pues nan mester haci procedura oficial dor di yena e aplicacion personalmente, y duna di conoce por ehempel, si nan ta for di 2016 na Aruba, dicon nan no a notifica cu nan kier haya asilo y cu nan mester proteccion.