ORANJESTAD – Manera nos a señala den nos edicion di ayera, Aruba tin un problema creciente di incumplimento cu e seguro obligatorio di pension pa sector priva. Hasta por constata cu nos no sa con grandi e problema ta. Esaki pasobra e companianan di seguro cu ta ehecuta e ley, tin logicamente un bista riba loke ta nan clientenan. Esun cu mester tin un bista riba e totalidad, y ken y cuanto di nan no ta cumpli, ta e supervision gubernamental cu no t’ey. Den un entrevista cu sr. Henry vd Berg, director di compania di seguro Ennia, nos a logra haya bastante informacion tocante e asunto aki.

Van den Berg a repasa cu nos varios detaye tocante e situacion actual. E dos companianan a cuminsa implementa e ley na inicio di 2012, aceptando como cliente e empresanan cu a acerca nan pa esaki. Unda por señala e problemanan di incumplimento?

Pa inicia su analisis, e ta declara cu enfasis cu e pension aki, basa riba 6% minimo durante maximalmente te na edad general di pension, sigur pa esnan cu entrada mas abao, no ta representa un pension solido cu cual nan por biba trankil ora nan no ta traha mas. Si bo kier esey, mester spaar hopi mas. E ta meramente anto un adicion minimo banda di e AOV.

E incumplimento ta tuma lugar mas tanto den e empresanan cu no tin bon administracion financiero. Esaki mas tanto ta e companianan mediano o chikito. E experiencia cu e companianan grandi ta cu nan ta bon organisa y ta cumpli bastante bon cu nan obligacionnan. Tambe empresa chikito ta mas vulnerable pa fluho financiero menos stabil cu den empresa grandi, sigur den sector unda ta traha via proyecto, manera den construccion.

BDA: Tin cierto sectornan cu ta mas vulnerable cu otro?
HvdB: Si, den construccion por bisa cu e companianan grandi, cu ta bon structura, no tin tanto problema, pero e contratistanan di menor tamaño tin mas dificultad pa cumpli cu nan obligacionnan.

Ademas nan ta experimenta cambio grandi entre nan personal, cu ta haci e administracion y pago di e primanan mas complica. Mesun cos por observa tambe den horeca, unda tambe tin hopi cambio cu personal cu ta traha pa tempo cortico y despues ta bay. “Bo ta haya gasto di administracion pa casonan cu talvez despues di un par di luna caba ta keda descontinua. Pa un suma relativamente chikito, mester haci varios accion administrativo, loke no ta conveniente, no pa e empresa, y pa e compania di seguro tampoco. Bo por bisa cu na e parti abao di e mercado e problemanan di cumpli y paga ta acumula. Por ta cu mester considera exonera companianan hopi chikito y cu hopi cambio di personal continuo di cumpli cu e ley. Esey ta algo cu lo mester discuti si.”

BDA: Boso por tin un idea di con grandi e incumplimento ta di esnan cu no tin un convenio, ni cu boso, ni cu boso competidor (Guardian Group)?
HvdB: “Esey ta e problema cardinal cu ni nos, ni nan (Guardian) por tin un bista ariba. Aki ta unda e supervision gubernamental mester bin aden, unda a base di nos informacion nan por detecta cual ta e empresanan cu no tin contract, ni cu nos, ni cu nos rival comercial.

Durante e añanan cu nos ta cumpliendo cu nos parti di e ley, gobierno ainda no a yega asina leu pa institui esaki. Si ta asina cu a yega di papia di con pa bay haci esaki. Probablemente e miho alternativa por ta pa relaciona e tarea aki di algun manera cu Banco di Seguro Social (SVb), por ehemplo, nombrando SVb como tal como e supervisor. Nan ta dispone caba, dentro di e ambito gubernamental, di gran parti di e informacion di empresa y nan personal pa loke ta e otro obligacionnan cu un empresa mester paga tur luna, manera AOV/AWW y ZV/OV. Loke ta parce nos urgente ta pa gobierno step up cu institucion di e supervision, pa conhuntamente nos por crea e intercambio di informacion digital pa completa e bista riba henter e mercado. Y tempo ta cuminsa preta: mas tempo no tin supervision, mas grave e situacion ta bira pa esnan cu no tin cobertura.”

BDA: Di e cooperacion di intercambio di informacion por surgi tambe bentaha pa otro tipo di seguro?
HvdB: “Corecto. Nos ta mira bentaha grandi di un plataforma digital pa otro seguro tambe, unda cierto tarea di supervision di gobierno por beneficia.

Imagina bo si nos por entrega digitalmente, online, real time, tur dato di seguro di auto, ken ta sigura, ken ta atrasa cu pago y no ta sigura. Ora polis haci control, nan no mester kere ningun hende cu nan ‘papelnan ta na cas’, pero por check inmediatamente si e auto ey ta sigura, y por duna un multa ey mes, si ta necesario. Tambe otro entidadnan, manera Servicio di Impuesto y DTI, por probecha di e database pa facilita nan trabao.”

BDA: E fondonan di seguro aki ta acumula y e empresanan mester inverti nan na un manera solido pa por logra un porcentahe razonable di rendimento, pa garantisa pago di pension na su debido momento. Con esey ta bay?

HvdB: “Bo por imagina bo cu esey tin su retonan, tambe pa motibo di e nivel abao di interes global. Tambe tin e exigencia cu 60% di e fondonan mester ta inverti localmente, loke no ta facil pasobra no tin tanto alternativa. Acceso na bono di gobierno di Aruba mes lo yuda. Esey ta un inversion basta stabiel.”

Y pa conclui: “E supervision lo ta beneficioso pa tur partner: e participantenan, gobierno, empresanan di seguro. Ademas, e ta necesario y prescribi pa ley.”