WASHINGTON – “Y kico awo?” Esey ta e pregunta den hopi hende nan mente despues cu diabierna atardi e Investigado Spe3cial Robert Mueller a conclui su investigacion riba lasonan entre Trump y Rusia, entregando e rapport final na Fiscal General William Barr.
Pero kico tur tin den e rapport aki no ta conoci ainda. Regulacionnan di Departamento di Husticia ta rekeri solamente pa Mueller entrega un rapport confidencial na e Fiscal General, caminda e ta splica e decisionnan pa bay tuma of nenga di persigui legalmente. E lo por ta mes simpel cu un lista di puntonan, pero e Departamento di Husticia a describi esaki como “extenso.”
Kico cu tin den e rapport, nos por keda sin haya tur e detayenan cu a keda descubri durante e ultimo 22 luna, por lo menos pa aworaki. Pero e storia aki ta leu di ta cla. Esaki ta loke por bay spera awo… Fiscal General Barr mester dicidi kico ta laga Congreso y publico haya sa. Den un carta na e legisladonan diabierna, Barr a sugeri cu esaki por bay sosode den fasenan. El a bisa cu e por comparti e conclusionnan principal di e rapport Mueller e fin di siman aki ainda. Tambe el a bisa cu e lo consulta cu Mueller y Fiscal General Interino Rod Rosentein pa wak ki otro informacion por saca cu “ta consistente cu ley.”
Tambe a indica cu e ta “comprometi na mas tanto transparencia posibel.” Pero Barr anteriormente a bisa cu e ta tuma na serio e parti di ‘lo keda confidencial’ den e regulacionnan cu ta dicta e rapport Mueller. El a tuma nota cu e protocol di e departamento ta bisa cu memonan interno splicando decision di acusacion no mester keda publica.
No ta mucho cla si Trump lo pidi pa wak e rapport completo y bou di cua circunstancia e of su abogadonan lo por ta den condicion pa wak e, specialmente pasobra e documento ta destina pa ta confidencial na e liderazgo di Departamento di Husticia. Mueller ta raporta na e Departamento di Husticia y no na Cas Blanco.
Barr a bisa na su audiencia di confirmacion cu e no lo permiti Cas Blanco pa interferi den e investigacion. Pero tambe a vocifera un punto di bista amplio di e poder ehecutivo den cual e funcionnan di e president como e oficial en hefe di e entidadnan legal di e pais y cu e tin un latitud amplio den duna ordo na FBI y Departamento di Husticia. Democratanan por pasa man pa cualkier informacion duna na e president pa argumento cu e rapport en berdad no ta confidencial y cu mester comparti’e cu nan tambe inmediatamente.
Democratanan ta exigiendo acceso na e rapport Mueller completo y na e evidencianan den e investigacion; nan ta menasa di bin cu citacion si nan no haya nan. President di e Comite di Inteligencia di Camara di Representantenan Adam Schiff a bisa na CNN cu Congreso mester sa “y e pais tambe.” Pero Trump, como lider di e poder ehecutivo por duna ordo na Departamento di Husticia pa bay contra di e citacion, creando e scenario pa un lucha legal cu por yega te na Corte Supremo.
Loke ta resaltante di loke a haya sa te aworaki, ta cu Mueller no ta haci recomendacion pa realisa ningun otro acusacion den e investigacion di Rusia.
