ORANJESTAD – Ayera tardi gobierno a firma e convenio pa continua cu e Trayecto di Formacion Social na Marinierskazerne.
E convenio aki cu ta busca duna structura y formacion pa nos hobennan cu tin problema di conducta a keda firma entre minister di asunto social, Glenbert Croes y Comandante Der Zeemarcht Carib, General P.J de Vin.
E mandatario a laga sa cu gobierno a dicidi di adopta e proyecto aki cu a bin for di gobierno anterior pasobra e ta cuadra cu nan plan pa atende cu e plan crisis social. El a bisa cu nos hobennan ta pasando den situacion sumamente dificil, y nan mester di un apoyo den haya structura cu lo yuda nan den e caminda futuro di nan bida.
“Nos ta kere cu formacion social ta instrumental den duna nos hobennan structura positivo pa nan futuro,” e mandatario a bisa.
Den cuadro di e firma di e convenio aki, minister Croes a pidi pa studia e posibilidad pa duna hende muhe e oportunidad tambe pa sigui e trayecto aki. Pero tambe pa esunnan cu ta culmina cu e trayecto aki cu ta dura un aña por incorpora y sigui su carera militar na Arumil. Actualmente 20 hoben ta siguiendo e trayecto aki.
Den e acto di firma aki tabata presenta e coordinador di e proyecto di formacion social aki, Jessica Ras. Tambe Arumil, departamento di asunto social y DPL.
