Falta maneho coherente di nos plasanan: Plaza Padu Lampe sin iluminacion y sin borchi

ORANJESTAD – Despues di un periodo basta largo e monumento di Dama di Husticia di e artista y escultor, Ciro Abath a wordo restaura. Mientras cu no ta husto cu otro monumento traha pa e mesun artista aki pa honra tres baluarte di nos cultura, Padu Lampe, Rufo Wever y Lio Booi cu a duna bida na nos Himno Nacional ta totalmente bandona.

E plasa Padu Lampe situa den pleno curason di Oranjestad, cerca di gabinete di Gobernador di Aruba y patras di bestuurskantoor y parlamento, no tin luz suficiente. Ni sikiera tin un borchi cu por duna referencia riba e nomber di e plasa aki, ni sikiera den conexion cu Dia di Himno y Bandera. E ta totalmente isola pa no bisa lubida, meymey di wowonan di tur hende.

18 di Maart mester ta un dia caminda nos monumentonan mester bisti di gala y resalta. Specialmente e monumentonan di esunnan cu danki na nan lucha, sacrificio y logro, nos por gosa di e pais cu nos tin awendia.

E artista Abath a declara na Bon Dia Aruba cu e ta consciente di e situacion di Plasa Padu Lampe, pero e no tin caminda pa cana. Sinembargo el a informa via Departamento di Infrastructura y Planificacion (DIP), si ainda prome cu 18 di maart e monumento di e tres baluarte di nos cultura por a haya a lo menos un briyo.

“E monumento ey no tin nada cu tecnicamente cu no por, excepto e luznan,” el a bisa. Riba e proyecto inicial di e plasa aki mester tabatin un continuidad, pero e fase ey no a wordo ehecuta nunca. Segun Abath e parti di e borchi no tabata den e proyecto mes, pero si el a wordo entama. Pero no tabatin un continuidad pa termin’e of haci’e tambe.

E artista ta haya un lastima cu nos no ta tene di haci distincion si ta algo politico di proyectonan cu ta wordo ehecuta dor di cualkier gobierno. E ta haya cu gobernacion tin cu sigui y un pueblo tin.

Plasa Padu Lampe mester wordo drecha. E ta haya cu esun concerni por toca na su porta libremente pa duna e resultado cu ta rekeri pa e monumento dedica na Padu Lampe -kende 26 di april ta cumpli su 99 aña di existencia- ta wordo drecha debidamente.

Otro monumento tin di haber cu esun dedica na Juancho Yrausquin kende ta wordo considera e tata di nos industria turistico. Un sector economico cu awendia nos pueblo ta depende casi exclusivamente di dje. E monumento aki dedica na un di nos estadistanan y visionario mas grandi di nos historia, ta un berguensa publico. E ta hole stinki, ya cu el a bira un refugio di adictonan ambulante.

Falta di maneho coherente
Independiente di cualkier tendencia partidista of ideologia politico, tur nos estadistanan a traha pa Aruba bay dilanti. Pues asina nan monumentonan cu ta honra nan memoria mester wordo mira. Sinembargo e realidad ta mustra otro.

No ta existi un maneho coherente ni structura riba e monumentonan di nos baluartenan y estadistanan nacional. E atencion rekeri pa cada monumento specifico, ta depende di e gobierno cu ta sinta y di nan signatura politico.

Segun director di DOW, Marlon Croes, riba e tereno aki tin un discusion cu nan mester hiba. Tin plasanan cu ta cay den maneho di departamento di cultura y otronan ta cay den maneho di DIP y otro plasanan ta cay den maneho di DOW. Esey ta discusion cu nan mester hiba na nivel di departamentonan pa wak kico lo ta e responsabilidad di cada un, y cual ta e suma aloca pa esey.

Den cuadro di celebracion di 18 di Maart, DOW a tuma e parti di bay drecha e cinco plasanan cu tin di haber cu nos dia nacional di Himno y Bandera. E drechamento aki ta inclui limpiesa, corta mata, bari y pone tur iluminacion bon.