ORANJESTAD – Awe ta Dia Internacional di Riñon, ocasion ideal pa tira bista riba con esaki ta afecta localmente. Lamentablemente mester bisa cu malesa di riñon ta un problema grandi, te cu el a bira un malesa cronico na Aruba.

Den cuadro di e fecha aki, Fundacion Kidneys 297 a dedica full e siman na divulga pakico mester tene un miho cuido, ya cu un bes e organo aki ta daña, no tin cura p’e. Un remarca cu semper nan ta haci den nan campaña di prevencion pa cuida riñon ta: Corda bebe awa frecuentemente.

Presidente di Kidneys 297, Miluska Sneek, a declara cu e fundacion a lanta 6 aña pasa pa traha riba tereno di prevencion y pa conscientisa nos comunidad tocante e malesa di riñon.

E ta keda un organo cu tin e funcion di regula y filtra bo sanger, ya cu e ta saca toxina for di dje; pues, su funcion ta hopi importante. Kidneys 297 ta sali for di punto di bista cu, si bo preveni pa yega na e malesa aki, ta un tarea importante cu como ser humano bo por haci.

Prevencion ta e clave
PR di e fundacion, Nastasha Bromet, a bisa cu den cuadro di Dia Internacional di Riñon, e tema di aña aki ta: ‘Kidney health for everyone everywhere.’

E indice di malesa di riñon ta alarmante no solamente na Aruba, sino mundialmente. Ta calcula cu 850 miyon hende den henter mundo tin malesa di riñon pa diferente causa. Segun data di organisacion mundial, e malesanan cronico di riñon (ERC) ta produci alrededor di 2.4 miyon morto pa aña y e ta e di seis causa di morto cu ta den aumento.

Na Aruba, e grupo di pashentnan cu ta dialisa pasobra tin problema cu funcion di su riñon ta basta grandi. Tambe tin pashent cu ta bayendo den e direccion aki. Pa tal motibo e fundacion ta conseha pa nos ta hopi cauteloso pa preveni y evita di yega na problema di riñon.

Segun Bromet, e causa cu nos tin un cantidad halto di hende cu problema di riñon, ta e falta di prevencion. Tin hende cu ya caba tin malesa cronico, ya sea presion y diabetes, cu den un termino largo por afecta nan riñon. Si nan no ta preveni esaki, nan por bira un pashent di dialisis.

Bromet a bisa cu mester evita cu un malesa di riñon bira cronico, ya cu esaki ta ocasiona cu e organo importante aki pa nos bida ta bay atras den forma incurabel. Loke nan ta conseha fundamentalmente ta pa preveni y pa no haya problema cu riñon dor di controla cerca bo dokter di cas.

Tambe si bo ta sufri di un malesa cronico, preveni pa bo no haya otro malesa. Por ehempel si bo ta sufri di diabetes, preveni pa bo no haya problema di presion banda di dje. Purba semper di mantene bo remedi y cumpli cu bo tratamento medico cabalmente. Pero fundamentalmente, purba di bebe mas awa cu bo por. E maximo por ta 2 liter pa dia. Esaki ta nifica cu ora bo ta bebe suficiente awa, bo ta laga bo riñon traha suficiente pa e por filter bo sanger bon y haci su trabou. Ta bon pa combina e prevencion cu un bon disciplina di ehercicio regular.

Awe, den conexion cu Dia Internacional di Riñon, fundacion Kidneys 297 tin un actividad na Bushiri Beach casi banda di Tamarijn hotel. E ta consisti di un seccion di ehercicio, otro di yoga y na final poco cos di come y bebe. Ta consehabel pa bin cu bo mat of serbete. For di 5’or atardi e registracion ta cuminsa y tur hende ta bon bini. E ta gratis!