ORANJESTAD – Director di Departamento di Naturalesa y Medio Ambiente (DNM) sr. Ghisbert Boekhoudt ta splica cu e actividad di cobamento di santo/ piedra ta uno cu ta causa daño ireparabel den paisahe y suela di Aruba.
Consecuentemente, ora cu kier duna e tereno un funcion bek, si esaki no wordo haci cu cautela, locual cu wordo construi riba dje ta resulta hopi fragil. Pues depende kico ta haci cu e area, despues e lo por haya un funcion util bek pa comunidad.
“E cobamento riba su mes ta e prome fase di un cadena cu ta bin despues, cu si no wordo haci cu cautela, e ta causa hopi daño”
Ki tipo di daño ta papia di dje?
E tipo di daño cu ta menciona ta depende di e tereno, pa motibo cu naturalesa riba su mes tin diferente servicio. Si e tereno ta banda di un rooi, por ehempel, of un sitio cu gran balor natural, e ta cambia e funcion ecologico di e area ora cu coba, kibra y kita santo, Boekhoudt a splica.
P’esey ta hopi importante pa percura pa tin control y tambe cu areanan natural indica den Ruimtelijke Ontwikkelingsplan (ROP) ta wordo proteha y respeta, Boekhoudt a termina bisando.
